Shefja e Grupit Parlamentar të Vetëvendosjes, Mimoza Kusari-Lila, ka folur mbi çështjen e liberalizimit të vizave dhe nëse ka kushte të tjera që do të mund të vendosen Kosovës.
Ajo tha se s’kanë ndonjë konfirmim zyrtar për kushtet që u përfolën, raporton Gazeta Express.
“Në momentin kur nuk ekziston një konfirmim zyrtar i kërkesave që janë për Kosovën apo kushteve teknike siç janë quajtur, unë kufizohem në dhënien e një përgjigje definitive në këtë fushë. Besoj që ky është një proces, ashtu siç është thënë shumë herë deri në këto momente tashmë është caktuar një datë kur vendet të cilat kanë propozuar ose kanë diskutuar për çështje që duan t’i ngrisin në raport për liberalizimin e vizave janë kërkuar që ato të dorëzohen me shkrim”, ka thënë Kusari-Lila në një konferencë për media.
Ajo tha se beson që procesi si i tillë do të vazhdojë në rrugën e vet dhe pashmangshëm Kosova është në udhëtim njëdrejtimësh.
“Integrimi në Bashkimin Evropian për Republikën e Kosovës nuk ka alternativë dhe ky është qëndrimi ynë në të gjitha funksionet që i ushtrojmë qoftë në legjislativ apo ekzekutiv”, tha ajo.
