Kusari-Lila për bllokadën në kuvend: T’i thërrasim mendjes, ta kapërcejmë ngërçin

Kryetarja e Alternativës, Mimoza Kusari-Lila, u bëri thirrje të gjitha partive pa dallim që t’i thërrasin mendjes, të ulin tonin e polarizimit dhe ndasive dhe të kapërcejmë këtë ngërçin institucional në Kuvendin e Kosovës.

Ajo tha se një obligim kushtetues është shndërruar në veprim politik nga subjekte të caktuara.

“Jemi gjithë dëshmitarë të 50 përpjekjeve të dështuara për Kuvendin e Kosovës, në të cilin institucione, subjekte të caktuara, fatkeqësisht kanë vendosur që një obligim kushtetues ta marrin si një veprim politik. Edhe sot, nga këtu, thirrje të gjitha partive pa dallim që t’i thërrasin mendjes, të ulin tonin e polarizimit dhe ndasive, të cilat po mundohen të ushqehen në Kuvendin e Kosovës, të marrin pjesë në votim sipas vullnetit të tyre dhe të kapërcejmë këtë ngërç, i cili po i kushton vendit dhe qytetarëve të saj.Më e rrezikshme është humbja e besimit nga brenda dhe e kemi vështirë ta rikthejmë dinamikën e angazhimit, qoftë për të mirën e vendit, qoftë për të mirën e tyre”, tha Kusari-Lila.

Ajo komentet i bëri në konferencë për media të partisë Alternativa, që e drejton, me ç’rast bëri të ditur se Alternativa do të garojë e vetme në zgjedhjete lokale në gjashtë komuna.