Kurz: Do të rikonfirmojmë perspektivën evropiane të vendeve të Ballkanit Perëndimor

Qeveria e Austrisë është organizatore dhe mikpritëse e Samitit të Ballkanit Perëndimor në kuadër të “Procesit të Berlinit”, të nisur nga kancelarja gjermane, Angela Merkel, vitin e kaluar.

Ky do të jetë samiti i dytë me radhë dhe është menduar që të tillë të ketë çdo vit për të ndihmuar bashkëpunimin rajonal, zhvillimin e infrastrukturës dhe përgatitjen e rajonit për integrim në BE në të ardhmen.

Në një intervistë për “Kohën Ditore”, ministri i Jashtëm i Austrisë, Sebastian Kurz, flet për pritjet nga ky samit dhe shpreh mendimet e tij për krizën e refugjatëve që kanë kapluar Evropën, duke mos lënë pa goditur edhe vendet e Ballkanit.

Ai thotë se me gjithë sfidat e shumta e ardhmja evropiane e rajonit është ende gjallë, ndërsa problemet e hapura që kanë mbetur mes vendeve të rajonit janë ato që mund të paraqiten si pengesë në këtë rrugë, prandaj edhe duhet të adresohen sa më herët.

Dhe pikërisht zgjidhja e problemeve të hapura bilaterale do të jetë njëra ndër temat e këtij samiti. Ministri Kurz thotë se “BE-ja nuk dëshiron të importojë asnjë konflikt të pazgjidhur dhe pikërisht për këtë kjo çështje do të jetë ndër temat që do të diskutohen në Vjenë” dhe shton se kriza e refugjatëve, lufta lundër ekstremizmit fetar do të jenë ndër temat e takimit po ashtu.

Sa i përket Kosovës dhe dialogut për liberalizimin e vizave, shefi i diplomacisë austriake thotë se ky dialog, i udhëhequr nga Komisioni Evropian, është duke vazhduar “në mënyrë të kënaqshme” dhe ai do të varet nga përparimi konkret dhe nga vlerësimi i rrezikut.

http://koha.net/?id=27&l=72203