Kurti, Zhbogarit: EULEX-i s’ka qenë as i drejtë e as parimor

Kryetari i Lëvizjes Vetëvendosje, Albin Kurti, dhe nënkryetarja Aida Dërguti, të hënën kanë pritur në takim Përfaqësuesin Special të BE-së për Kosovë, Samuel Zhbogar, i shoqëruar nga Blerta Bejtullahu, analiste politike.

Kurti ka thënë se Misioni Evropian për Sundim të Ligjit në Kosovë, EULEX, që nga fillimi nuk ka qenë as i drejtë e as parimor, ndërsa ka theksuar se duhet të jap llogari për paratë e shpenzuara të taksapaguesve evropianë.

“EULEX-i nuk ka qenë as i drejtë e as parimor që të sjellë drejtësi e rend dhe në kohën kur do të duhej të jap llogari për 1,5 miliardë euro të taksapaguesve evropianë të shpenzuara në këto gjashtë vjet del imponimi i Gjykatës së Veçantë për Kosovën pa e pasur njëherë një të tillë për Serbinë”, ka thënë Kurti në takim me Zhbogarin.

Gjatë këtij takimi u diskutua edhe për situatën dhe zhvillimet aktuale politike dhe socio-ekonomike në Kosovë dhe rajon. Gjatë diskutimit u bisedua edhe për rëndësinë e luftimit të korrupsionit dhe zhvillimin ekonomik, që u tha se është një ndër prioritetet e Lëvizjes Vetëvendosje të shprehura edhe në Alternativën e saj Qeverisëse, transmeton koha.

Ndërkaq, gjatë një bisede që ambasadorja amerikane, Tracey Ann Jacobson pati me qytetarët në rrjetin social Twitter, kur u pyet se çfarë mendon për Vetëvendosjen tani, ajo tha se ka qëndrim të pandryshuar dhe theksoi se nëse ky subjekt politik ndryshon qëndrimin e konfrontimit fizik, ajo me gjithë qejf do takohej me ta.