Kurti: Vetëvendosje ka përgatitur alternativën qeverisëse

Prishtinë – Lëvizja “Vetëvendosje” ka shënuar 8 vjetorin e themelimit të saj. Lideri i këtij subjekti politik, Albin Kurti, ka folur për këto vite të veprimit në skenën politike dhe atë aktiviste në Kosovë, duke thënë se e kanë ndryshuar konceptin e të menduarit në shoqërinë kosovare.

Ai, ka thënë se lëvizja e tij po rritet dita ditës dhe për këtë sipas tij, ky subjekt ka përgatitur edhe alternativën qeverisëse, duke synuar ndryshime rrënjësore në vend me theks të veçantë zhvillimin ekonomik, por duke mos lënë anash edhe bashkimin kombëtar.

Kurti, edhe në këtë rast ka kritikuar Qeverinë e Kosovës, duke thënë se ajo e ka zaptuar shtetin. Kurse, sa i përket qëndrimit të delegacionit të kësaj lëvizjeje në SHBA, sipas Kurtit, është tentuar që tu tregohet për gjendjen reale në Kosovë dhe hapat që duhet të merren për përmirësimin e kësaj gjendje, mirëpo, sipas tij, nuk është kërkuar nga përfaqësuesit e departamentit të shtetit amerikan, ndryshimi refuzues që kanë ndaj VV-së.

Ndërkohë, nënkryetarja Aida Dërguti ka folur për nivelin e anëtarësimit të gjinisë femërore në këtë subjekt, ku ende mbetet numër i vogël.