Fundamenti

Kurti publikon statistikat: Serbia po propagandon për dhunën ndaj serbëve në Kosovë

/ 2 minuta lexim
Mobi Casa

Kryeministri i Kosovës, Albin Kurti, ka thënë se Serbia po propagandon për dhunën ndaj serbëve në Kosovë.

Duke iu referuar fakteve konkrete, Kurti ka vënë në dukje se narrativat për keqtrajtim ndaj serbëve janë produkte të një makinerie propagandistike me qëllim zhbërjen e imazhit të Kosovës si një shoqëri inkluzive dhe paqësore.

“Në kërkimin për të mbjellë kaos, regjimi autoritar në Serbi nuk nguron të shpifë dhe të deformojë të vërtetën,” deklaroi kryeministri Kurti.

Ai përmendi disa incidente specifike, duke përfshirë rastin tragjik në Banjskë dhe vrasjen e oficerit të policisë, Afrim Bunjaku.

“Statistikat e policisë tregojnë një realitet të ndryshëm nga ajo që përpiqet të përhapë propaganda serbe,” vijoi Kurti, teksa zbuloi shifrat e fundit që flasin për numrin e vrasjeve të ndodhura që nga viti 2021 deri më sot.

RCCOLA

Sipas tij, në Kosovë janë kryer 86 vrasje, ku shumica e tyre i përkasin komunitetit shqiptar, ndërsa vetëm një numër i vogël i viktimave janë serbë ose anëtarë të etnive të tjera.

Kurti theksoi se në të tri rastet e vrasjeve të serbëve, të ndodhura në vitin 2022, të gjithë të dyshuarit për vrasjet janë sërish pjesëtarë të komunitetit serb.

Ai shpreh besimin se këto statistika hedhin dritë mbi tentativat për të përshkallëzuar një situatë që nuk ekziston dhe për të krijuar një imazh të padrejtë për Kosovën në arenën ndërkombëtare.

Kryeministri i Kosovës shprehu angazhimin e tij dhe të Qeverisë për të ruajtur dhe avancuar sundimin e ligjit dhe për të garantuar sigurinë e të gjithë qytetarëve, pavarësisht etnisë së tyre, dhe kritikoi Serbinë për përdorimin e incidenteve individuale për të ushtruar presion politik ndaj Kosovës./Telegrafi/