Kurti nga SHBA: Kosova, fanar i demokracisë në Ballkan – Serbia, shtet njëpartiak me Vuçiqin në krye

Kryeministri i Kosovës, Albin Kurti, është duke marrë pjesë në një bashkëbisedim në Këshillin e Atlantikut në SHBA. Në fjalimin e tij hyrës, ai ka theksuar se Kosova po ec përpara si shtet demokratik, por ka thënë se shqetësim mbetet fqinji verior Serbia, të cilën e ka quajtur shtet njëpartiak.

Kryeministri Kurti ka thënë se Kosova është fanar i demokracisë në Ballkan.

“Jemi fanar i demokracisë në Ballkan, një prej vendeve më demokratike në Ballkan. Jemi ngritur me 17 pozita në indeksin e Transparency International sa i përket percepsionit të korrupsionit. Kemi shtuar mbi 25 mijë vende pune”, ka thënë ai.

Për Serbinë, Kurti ka thënë se s’është aspak demokraci, por shtet njëpartiak me Vuçiqin në krye.

“Fqinji verior s’është aspak demokraci. Është shtet njëpartiak me Vuciqin në maje. Mungesa e demokracisë shpjegon mbështetjen e tij për Putinin”, ka thënë ai.

Kurti vlerësoi se Kosova është storie suksesi prandaj duhet të mbështetet për integrime në NATO e BE.

“Kosova është storie e suksesit dhe duhet të mbështetet me ndihma edhe më të mëdha ekonomike, që të bëhet anëtare e NATO-së dhe BE-së, organizata të tjera, pa vonesa”, ka theksuar ai.

“SHBA është partneri më i madh dhe më i afërt i Kosovës, lidhemi për vlerat e përbashkëta të lirisë dhe demokracisë”, ka thënë tutje kryeministri Kurti. /GazetaExpress/

Shpërndaje.
© RAJONIPRESS