Kurti në Tel Aviv: Të njihet e pranohet Republika e Kosovës

Kreu i Vetëvendosjes, Albin Kurti, ka njoftuar se ka marrë pjesë në një takim me progresistët socialdemokratë nga mbarë bota që u mbajt në Tel Aviv të Izraelit. Në këtë takim u diskutua edhe për nevojën që të njihet e pranohet Republika e Kosovës.

Kurti përmes llogarisë së tij në Facebook, tregoi se ka deklaruar edhe në lidhje me krizën mes Izraelit dhe Palestinës.

“Izraeli është shumë shtet, është më shumë se shtet. Palestina është pak shtet, është më pak se shtet. Kërkesa për zgjidhjen me dy shtete është shprehje e kërkesës për barazi”, ka thënë Kurti.

Ndër të tjera tha se kur socialdemokratët i quajnë regjimet e ndryshme “popullistë”, u bëjnë favor. Sepse shpesh ata janë racistë e fashistë.

“Shumë politikanëve e partive, regjimeve të ndryshme anekënd globit, u bëjmë favor kur i quajmë populistë. Sepse shpesh ata janë veçse racistë ose fashistë ose edhe të dyja këto”, ka shkruar Kurti.

Në fund Kurti tha se sikurse çlirimi edhe zhvillimi vjen nga brenda. Ndihmohet nga jashtë por nuk nis dot prej jashtë.

“Sikurse çlirimi edhe zhvillimi vjen nga brenda. Mund të ndihmohet prej jashtë, por nuk nis dot prej jashtë. Kësisoj edhe mirëmbahet qasja nga poshtë-lart, nëpërmjet së cilës ruhet prioriteti i socio-ekonomisë mbi gjeopolitikën e që është detyrë e të majtës kudo e kurdo”, ka përfunduar Kurti.