Kurti në takim me Costan: Kosova ka progres të rëndësishëm në reforma, demokraci dhe ekonomi – e gatshme për status kandidat në BE

Kryeministri në detyrë i Kosovës, Albin Kurti, ka pritur në takim presidentin e Këshillit Evropian, Antonio Costa, gjatë vizitës së këtij të fundit në Prishtinë, në prag të Samitit BE–Ballkani Perëndimor në Tivat.

Në komunikatën e Qeverisë thuhet se Kurti e ka falënderuar Bashkimin Evropian për mbështetjen e vazhdueshme ndaj Kosovës, duke e cilësuar atë si donatorin më të madh në procesin e zhvillimit dhe ndërtimit të vendit.

“Kosova ka shënuar progres të rëndësishëm në reforma, demokraci dhe ekonomi,” u shpreh Kurti, duke përmendur përmirësime në sundimin e ligjit, luftën kundër korrupsionit, lirinë e mediave dhe rritjen ekonomike.

Ai theksoi gjithashtu përkushtimin e Qeverisë ndaj reformave që dalin nga Plani i Rritjes dhe instrumentet e para-anëtarësimit të BE-së, duke nënvizuar rëndësinë e marrjes së statusit kandidat për Kosovën.

Në takim u diskutua edhe për bashkëpunimin me institucionet evropiane, sigurinë rajonale dhe rëndësinë e fqinjësisë së mirë në Ballkanin Perëndimor.

Sipas njoftimit, Kurti ka riafirmuar se Kosova është rreshtuar plotësisht me politikën e jashtme të BE-së, përfshirë dënimin e agresionit rus ndaj Ukrainës dhe mbështetjen për sanksionet ndaj Federatës Ruse.

Ky ishte takimi i dytë i António Costa në Prishtinë, pas vizitës së tij të mëparshme në maj të vitit të kaluar. /Zëri