Kurti liston punët që ka bërë Qeveria e tij për anëtarësimin e Kosovës në BE

Kryeministri i Kosovës, Albin Kurti përmes një shkrimi ka përmendur procedurat që vendi i ka zbatuar me qëllim anëtarësimin në Këshillin Evropian dhe në Bashkimin Evropian.

Ai ka thënë se Ministria e Punëve të Jashtme në kuadër të këtij synimi ka realizuar 500 takime zyrtare jashtë vendit, raporton Zeri.info.

“Aplikuam dhe kaluam me sukses fazën e parë të anëtarësimit në Këshillin e Evropës, sepse e meritojmë. Dorëzuam aplikimin për anëtarësim në Bashkimin Evropian në fund të vitit të kaluar, sepse Evropa është kontinenti ynë e Bashkimi Evropian është fati ynë. Ndërkohë këtë vit u anëtarësuam në Partneritetin për Qeverisje të Hapur (OGP) dhe në Komisionin Ndërkombëtar për Personat e Zhdukur (ICMP)”, shkroi ai ndër tjera.

Përveç kësaj ai tha se Qeveria e tij u mundua të mbajë marrëdhënie të mira me aletatët, por edhe të krijojë marrëdhënie të reja.

“E politika e jashtme është reflektim i qeverisjes së brendshme. Ligjshmëria, reformat, luftimi i korrupsionit dhe praktikave korruptive dhe qeverisja e mirë, u vërejtën dhe u vlerësuan nga të gjithë partnerët tanë brenda Bashkimit Evropian, përfshirë edhe disa vende hezituese kur vinte puna te liberalizimi i vizave për Kosovën. Me qeverisjen tonë dhe pas votimit përfundimtar të Parlamentit Evropian, tanimë është e qartë, nga data 1 janar 2024, qytetarët e Kosovës do të kenë mundësi që të udhëtojnë lirshëm në zonën Shengen”, theksoi ai. /Zëri