Kurti: Krerët e shtetit nuk e dënuan Regjimin e Gruevskit

Deputeti i Lëvizjes Vetëvendosje, Albin Kurti, tha sot në Kuvend se krerët shtetërorë të Kosovës i dënuan qytetarët e vet në incidentin në Kumanovë.“Presidentja Jahjaga dhe kryeministri Mustafa dënuan shtetasit e Republikës së Kosovës të përfshirë në incidente në Maqedoni, ministri i jashtëm Thaçi me gjuhë edhe më të ashpër dënonte cenimin e rendit dhe sigurisë në Maqedoni, ndërkaq kryetari i Kuvendit Veseli shprehte besimin e tij në vullnetin e kapacitetet e shtetit maqedonas. Mbi të gjitha, asnjëri prej tyre nuk e dënoi regjimin autokratik të Gruevskit, i cili me kryespiunin Mihajlkov e kryepolicen Jankullovska, është dëshmuar për qëndrimet e veprimet e tyre anti-demokratike e anti-shqiptare”, tha Kurti.

Ai tha se Serbia ka ndikim në Maqedoni, dhe përmes saj provon t’i realizojë qëllimet e saj ndaj shqiptarëve.

“Karakterin dhe orientimin e shtetit të Maqedonisë nuk mund ta kuptojmë pa ndikimin e Serbisë dhe interesat e saj. Dallimi midis Gruevskit dhe Georgievskit është si dallimi midis Serbisë dhe Bullgarisë. Se Serbia shfaqet si mbrojtëse e Maqedonisë edhe e kemi ditur nga historia edhe e kanë thënë vetë krerët e Serbisë shpesh”, shtoi Kurti.

“Nuk do të mund të mbijetojnë edhe regjimi i Gruevskit edhe shteti i Maqedonisë. Sipas regjistrimit zyrtar të popullsisë në Maqedoni, shqiptarët përbëjnë mbi çerekun e banorëve të Maqedonisë ndërkohë që numri i tyre realisht sillet mbi një të tretën e popullsisë”, shtoi Kurti.

Madje ai paralajmëroi që në rajonin e Ballkanik po krijohen gjasat për tri raste si i Bonjës.

“Në vend se të kemi debosnjëzim të Bosnjës, po rriten gjasat për tri bosnjë në rajon: Bosnja si bosnje, Kosova si Bosnja e pasluftës me ‘Zajednicën’ e instaluar dhe Maqedonia si Bosnja e paraluftës me regjimin e Gruevskit”, tha ai.

Kurse Zafir Berisha (Nisma) tha se Kumanova ishte një storie jo e këndshme.

“Dhuna e paparë e një regjimi shtetëror të një lagjeje shqiptare tregoi brishtësinë e fqinjësisë. Zyrtarët e qeverisë nuk janë deklaruar konform asaj që ka ndodhur në Kumanovë të Maqedonisë”, tha Berisha.