Kurti i tregon Zbogarit pse kundërshton dialogun

Lëvizja Vetëvendosje përmes një njoftimi për media ka bërë me dije se drejtuesit e saj kanë takuar sot shefin e zyrës së BE-së dhe përfaqësues special i Bashkimit Evropian në Kosovë, Samuel Zbogar.

Në takim u bisedua për procesin e dialogut politik mes Kosovës dhe Serbisë të ndërmjetësuara nga Baronesha Ashton. Albin Kurti shpjegoi arsyet pse Lëvizja Vetëvendosje është kundër dialogut politik, i cili po bëhet pa kushte ndaj Serbisë dhe për çështjet e brendshme të Kosovës”, thuhet në njoftimin e lëshuar nga VV.

“Vetëm trajtimi i Kosovës si shtet i pavarur, sovran e i barabartë e jo si një rast i veçantë, garanton zgjidhje të drejtë dhe të qëndrueshme të problemeve në raportet mes Kosovës dhe Serbisë”, kanë thënë drejtuesit e VV-së në takim me Zbogar.

Në komunikatë thuhet se Vetëvendosje ka paraqitur qëndrimin se, “pa luftimin e strukturave ilegale të Serbisë në Kosovë nuk mund të ketë integrim të qëndrueshëm institucional e shoqëror të pakicës serbe në Kosovë”

“Albin Kurti tha se luftimi i strukturave ilegale shtetërore të Serbisë do të duhej të bëhej paralelisht me zhvillimin ekonomik në Mitrovicë bazuar në prodhim e që do të bënte zvogëlimin e papunësisë”, thuhet në kumtesën e VV.

VV kërkoi që “BE-ja, në vend se të akomodojë kërkesat e udhëheqjes së re të Serbisë, të ushtrojë presion ndaj tyre ngase mënyra se si ata po sillen në raport me Kosovën dhe integritetin territorial e sovranitetin e Kosovës, por edhe historiku i tyre, duhet të jenë të papranueshme për BE-në”. /rajonipress/