RCCOLA

Kurti flet në Zvicër për dialogun: Ne jemi në të drejtën tonë, duhet t’i përmbahemi kornizës pa marrë obligime të reja

/ 4 minuta lexim

Kryeministri Albin Kurti gjatë vizitës së tij në Bern të Zvicrës, ka folur edhe për aktualitetin politik në Kosovë. Sa i përket dialogut, ai ka thënë se Kosova është në të drejtën e saj dhe se duhet t’i përmbahet kornizës së marrëveshjeve të arritura deri më tani, pa marrë detyrime të reja.

Këto deklarime Kurti i ka bërë në një konferencë për media, pas takimit që ka zhvilluar me Presidentin e Konfederatës zvicerane, Alain Berset.

“Ne jemi në të drejtën tonë. Në fjalën që kam mbajtur më 14 shtator para mediave në Prishtinë kam sqaruar se në dialogun e fundit ne si Kosovë kemi bërë tri propozime, ndërsa Serbia asnjë. Në këto rrethana, ne duhet t`i përmbahemi kornizës së marrëveshjeve që kemi marrë si obligim dhe jo të marrim detyrime të reja”, është shprehur kreu i ekzekutivit kosovar.

Sa i përket takimit me presidentin Berset, Kurti ka thënë se kanë biseduar për marrëdhëniet mes dy vendeve dhe rritjen e këmbimit tregtar.

“Me presidentin Berset njihemi që nga pjesëmarrja ime në Forumin e Davosit, në fillim të vitit. Me të kemi biseduar për marrëdhëniet e shkëlqyeshme në mes të dy vendeve, për rritjen e madhe të këmbimit tregtar, që në vitin 2022 ka qenë për një të tretën më i madh se një vit më parë.

Pastaj është nënvizuar edhe fakti se remitencat nga bashkatdhetarët tanë në Zvicër përbëjnë një të pestën e të gjitha remitencave që vijnë në Kosovë. Po ashtu, në bashkëbisedim me presidentin Berset është theksuar shkalla e lartë e integrimit të qytetarëve nga Kosova në Zvicër etj”, ka deklaruar ai, shkruan albinfo.ch.

KKGJILAN

Për takimin mes Kurtit dhe Berset ka njoftuar edhe Zyra e Kryeministrit të Kosovës, përmes një komunikate për media ku thuhet se “marrëdhëniet ndërshtetërore, afërsia mes popujve, bashkëpunimi bilateral, shkëmbimet tregtare dhe zhvillimet e fundit ishte temat qendrore të këtij takimi”.

“Kryeministri Kurti shprehu mirënjohjen e tij të thellë për mbështetjen e Zvicrës në çdo etapë të rezistencës, çlirimit, pavarësimit, shtetndërtimit e zhvillimit, si një nga vendet e para që e njohën Kosovën. Ajo edhe sot vazhdon të përkrah shtetin e Kosovës, përfshirë në arenën ndërkombëtare, siç u dëshmua edhe me mbështetjen për aplikimin e Kosovës për anëtarësim në Këshillin e Evropës. Ai falënderoi Zvicrën edhe për rolin e saj në fushën e mbrojtjes dhe sigurisë, përmes misionit të Swisscoy, në kuadër të KFOR-it, të cilit së fundi i është vazhduar mandati deri në vitin 2026”, thuhet në njoftim.

Më tej, bëhet e ditur se Kurti e ka njoftuar presidentin Berset për zhvillimet e fundit në vend, raportet me Serbinë dhe procesin e dialogut, për rezultatet e deritanishme të qeverisjes, politikat prioritare dhe për “progresin e shënuar në rrafshin ekonomik, demokratik dhe të luftimit të korrupsionit, sikurse është evidentuar edhe nga raporte kredibile ndërkombëtare për dy vite rresht”.

“Në mesin e politikave zhvillimore në të cilat shteti i Zvicrës ka luajtur një rol të rëndësishëm pozitiv, kryeministri Kurti veçoi atë të arsimit dual i cili këtë vit akademik do të zgjerohet në gjithsej 12 profile të ndryshme, në 13 komuna dhe 21 shkolla profesionale dhe përmes së cilit synohet që të bëhet lidhja ndërmjet arsimit profesional dhe tregut të punës”.

“Të dy folën për mundësitë në fushat me potencial për bashkëpunim më të thelluar dhe për marrëveshje të reja që e shtojnë atë, në veçanti në kuadër të EFTA-s”, thuhet në njoftim. /Telegrafi/