Kurti: Diplomatët ndërkombëtarë vetëm sa po transmetojnë kërkesat e Serbisë, kjo është e kuptueshme

Lideri i Vetëvendosjes Albin Kurti i ka komentuar vizitat e fundit të diplomatëve të huaj në Kosovë, të cilët u munduan ta bindnin kryeministrin Haradinaj për heqjen e taksës.

Kurti ka shkruar në Facebook se ata po veprojnë si transmetues të kërkesave të Serbisë dhe kjo sipas tij është e kuptueshme.

“Vuçiq e ka kërkuar heqjen e tarifës 100% ndaj mallrave të Serbisë në Kosovë. Diplomatë e politikanë të ndryshëm ndërkombëtarë që kërkojnë të njëjtën gjë, vetëm sa e transmetojnë kërkesën e Presidentit të Serbisë ndaj Kosovës. E kuptueshme, sepse ata janë ndërmjetës të diplomacisë fluturuese midis Kosovës dhe Serbisë”, ka shkruar Kurti në Facebook, përcjell zeri.info.

Ai ka bërë një krahasim interesant. Sipas tij zyrtarët evropianë dhe amerikanë po i kanë “nga dy kapela” dhe kjo sipas tij është e njëjtë me rolin që kishte dikur Pieter Feith, përfaqësues special i BE’së për Kosovën.

“Zyrtarët nga Evropa dhe ShBA-ja tash i kanë nga dy kapela, sikurse dikur Pieter Feith në Kosovë, edhe Përfaqësues Civil Ndërkombëtar që na e njihte pavarësinë, edhe Përfaqësues Special i BE-së që nuk na e njihte pavarësinë! Të gjithë ata janë bërë Pieter Feitha tani: njëra kapelë (bilaterale) është e shtetit të tyre që na e ka njohur pavarësinë e shtetit tonë, kurse kapela tjetër (multilaterale) është ajo e ndërmjetësit të jashtëm që vjen me porositë e palës tjetër. Nuk duhet t’i ngatërrojmë në mendjen tonë kapelat e tyre”, ka shtuar tutje ai./zeri.info/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).