Kurti dhe Peachi bisedojnë për dialogun Kosovë-Serbi dhe liberalizimin e vizave

Kryeministri i Kosovës, Albin Kurti ka pritur në takim të Dërguarin e posaçëm të Mbretërisë së Bashkuar për Ballkanin Perëndimor, Sir Stuart Peach.

Në këtë takim u diskutua për normalizimin e marrëdhënieve mes Kosovës e Serbisë, ku u theksua se duhet njohja reciproke, raporton Zeri.info.

Bëhet e ditur se Peachi ka ritheksuar se vendi i tij është i përkushtuar që në Ballkanin Perëndimor të ketë paqe dhe stabilitet.

“Duke theksuar rëndësinë e liberalizimit të vizave për qytetarët e Kosovës, Kryeministri Kurti ritheksoi synimin dhe angazhimin e Qeverisë për t’u bërë pjesë e Bashkimit Evropian dhe NATO-s”, thuhet në komunikatë.

Përveç këtyre u diskutua edhe për krizën ekonomike e energjetike pas luftës në Ukrainë, teksa Kurti njoftoi emisarin Peach për masat e ndërmarra nga Qeveria, në mbështetje të qytetarëve, nëpërmjet Pakos për Përballje me Inflacionin si dhe asaj të Ringjalljes Ekonomike.

“U bisedua për bashkëpunimin rajonal dhe Tregun e Përbashkët Rajonal në kuadër të Procesit të Berlinit. Po ashtu, u fol dhe për Samitin e Ballkanit Perëndimor “The Ëestern Balkans Summit 2022”, organizim i The Economist, në bashkëpunim me Zyrën e Kryeministrit të Republikës së Kosovës, që do të mbahet nesër në Prishtinë”, thuhet ndër të tjera. /Zëri

Shpërndaje.
© RAJONIPRESS