Kurti bisedon me socialistët evropianë, i njofton ata për hapat e Thaçit për një qeveri të re “antikushtetuese”

Kryeministri në detyrë i Kosovës, Albin Kurti, mori pjesë në konferencën e organizuar nga Partia e Socialistëve Evropianë dhe grupi S&D.

Konferensa është mbajtur me qëllim të adresimit të sfidave rreth rreth COVID-19, situatën politike dhe rrugët e bashkëpunimit e solidaritetit në Ballkanin Perëndimor.

Kurti në konferencë ka njoftuar përfaqësuesit e partive të majta në Evropë për menaxhimin e situatës nga Qeveria e Kosovës, për parandalimin e përhapjes së koronavirusit, thuhet në komunikatën e zyrës së kryeministrit, përcjell “Zëri.info”.

“Kryeministri Kurti i njoftoi përfaqësuesit e partive të majta në Evropë për menaxhimin e suksesshëm që Qeveria e Kosovës ka bërë për ta parandaluar përhapjen e virusit Korona, për të rritur numrin e të shëruarve, dhe zvogëluar vdekshmërinë e pacientëve të prekur. Ai përmendi edhe masat që ka ndërmarr qeveria për t’i ndihmuar qytetarët dhe bizneset, njëherit duke vlerësuar edhe ndihmën financiare e materiale të Shteteve të Bashkuara të Amerikës, Bashkimit Evropian dhe shteteve të tjera aleate të Republikës së Kosovës”, thuhet në komunikatë.

Tutje thuhet se Kurti i ka njoftuar të pranishmit edhe për vendimin e presidentit Thaçi për formimin e qeverisë së re.

“Rreth situatës politike, kryeministri Kurti i njoftoi të pranishmit për vendimin antikushtetues të Presidentit për ta bërë qeverinë e re me partitë e vjetra, ku theksoi se e vetmja rrugë përpara është ajo e mbajtjes së zgjedhjeve pas kalimit të pandemisë. Pra, ajo e respektimit dhe jo e shkeljes së vullnetit qytetarë të shprehur me datë 6 tetor”, ka thënë zyra për media e kryeministrisë. /ZËRI