“Kurti bëri gabime”, Joseph: SHBA është një mik i fortë dhe më i mirë i Kosovës

Profesori i Universitetit, Johns Hopkins në SHBA, Edward P. Joseph, i ka bërë një analizë momentit ku ndodhet rajoni dhe marrëdhëniet e Kosovës me aleatët.

Duke folur lidhur me zhvillimet e fundit në dialogun Kosovë –Serbi, dhe nëse ky proces ka ngecur dhe ndërmjetësuesit e Bashkimit Evropian nuk po e bëjnë punën siç duhet, Joseph mendon se çdo palë ka përgjegjësinë e saj, përfshirë Bashkimin Evropian dhe Shtetet e Bashkuara.

“Ne humbëm ndeshje, nuk fitoi Lazio” – Tuchel sërish me deklarata interesante pas disfa…Luana Vjollca provokon me paraqitjen për Shën ValentinSi po i jep Ukraina grushtin më të fortë Rusisë, në betejën për Detin e ZiTetë probleme të raportuara nga qytetarët e Ferizajt, rregullohen nga komuna“Kurti bëri gabime”, Joseph: SHBA është një mik i fortë dhe më i mirë i Kosovës

“Unë mendoj se Shtetet e Bashkuara kanë një përgjegjësi të madhe këtu… Ka shumë gabime të mëdha për të cilat dua të flas. Së pari është gabimi i Shteteve të Bashkuara dhe Bashkimit Evropian ndaj Presidentit të Serbisë, Aleksandar Vuçiq dhe refuzimi i SHBA-ve dhe BE-së për ta parë presidentin Vuçiq për atë që është. Ky është një autokrat që po e çon Serbinë prapa, po e merr Serbinë nga BE-ja dhe po e shtyn më afër Rusisë, po destabilizon rajonin. Pra, ky është gabimi i parë. Pika ime e dytë është të flas për gabimet e kryeministrit Albin Kurti, i cili i ka dhënë presidentit Vuçiq dhuratën për të larguar vëmendjen nga ushtrimi i presionit që duhet të bëhet ndaj Beogradit, për organizimin e sulmit të shtatorit në veri të Kosovës, për deformimin e rezultatit të zgjedhjeve për të cilin është mbajtur përgjegjës me një shumicë të madhe votash në Parlamentin Evropian për mashtrime zgjedhore në Serbi. Dhe në vend të kësaj, kryeministri Kurti po i jep Presidentit Vuçiq një dhuratë duke larguar të gjithë vëmendjen nga Beogradi, aty ku duhet të jetë, dhe në vend të kësaj e ka tërhequr vëmendjen te Prishtina për qasjet e gabuara ndaj politikës në Kosovë”, tha Jospeh për televizionin shqiptar A2CNN.

Joseph ka folur edhe për vendimin e Bankës Qendrore të Kosovës lidhur me dinarin serb, duke pyetur se “nëse është vetëm çështje e Bankë Qendrore, atëherë pse kryeministri Kurti flet vazhdimisht për këtë dhe përse po bën komente politikash për këtë?”.

“Nëse është kështu, atëherë ai thjesht mund të thotë: ‘Epo, më falni, ju duhet t’i çoni të gjitha pyetjet tuaja në Bankën Qendrore sepse kjo është vetëm çështje e politikës së Bankës Qendrore të Kosovës. Kjo është një çështje se si Kosova i trajton të gjithë qytetarët e saj dhe se si Kosova merr vendime të rëndësishme dhe komplekse të politikave. Këtu nuk bëhet fjalë vetëm për ndonjë rregullore për përdorimin e euros, që mund të jetë për qëllime shumë të mira dhe absolutisht që ne dhe miqtë e tjerë të Kosovës e njohim. Ai përfshin gjithashtu çështje të taksimit, të transfereve tatimore. Këto janë çështje të rëndësishme dhe komplekse. Dhe kryeministri Kurti sërish ka marrë një vendim krejtësisht të pakoordinuar, pa asnjë njoftim”.

Ai thotë se Banka Qendrore mund ta kishte diskutuar lehtësisht vetë këtë me Bashkimin Evropian, me Shtetet e Bashkuara.

“Në vend të kësaj ai vazhdon me veprime të pakoordinuara që po dëmtojnë interesin kombëtar të Kosovës. Kjo është ajo që po e përsëris këtu, kjo është ajo që është e rëndësishme. Këto lloj hapash të pakoordinuar dëmtojnë interesin kombëtar të Kosovës. Ata para publikut kosovar paraqiten si një pohim i fuqishëm i sovranitetit të Kosovës dhe madje mund të kenë një bazë për këtë. Por pa mbështetjen e Shteteve të Bashkuara dhe Bashkimit Evropian, këto janë gabime që forcojnë vetëm në duart e presidentit Vuçiq. Dhe unë theksoj këtu se seanca e Këshillit të Sigurimit të OKB-së që u mbajt javën e kaluar ishte krejtësisht e panevojshme. Nuk pati nevojë për një seancë të tillë. Dhe kjo erdhi vetëm si një dhuratë për presidentin Vuçiq, i cili mund të luajë mbrojtësin e madh të serbëve të Kosovës dhe dhuratë edhe për Rusinë e Kinën, vende të cilat po minojnë në mënyrë aktive pavarësinë e Kosovës, duke u dhënë atyre një platformë për të folur se sa e keqe është Kosova. Pra ky është një gabim shumë i rëndë i kryeministrit Kurti. Nuk është hera e parë. Dhe ai ka nevojë, dhe bashkëpunëtorët e tij të ngushtë duhet ta kuptojnë se nuk mund të luajnë më kështu me interesat kombëtare të Kosovës”, thotë analisti amerikan.

Ai më tej tha se në seancën e Këshillit të Sigurimit të javës së kaluar Rusia dhe Kina patën mundësi të madhe për të kritikuar Kosovën, për të folur se sa e keqe është Kosova dhe çfarë se thanë Shtetet e Bashkuara, që mbrojtjen Kosovën.

“Shikuesit kanë mund të dëgjojnë vetë dhe të vendosin vetë nëse janë Shtetet e Bashkuara që gjithmonë e respektojnë dhe dalin në pah si mbrojtësit më të fortë të pavarësisë së Kosovës. SHBA është një mik i fortë, miku më i mirë i Kosovës. Por kryeministri Kurti duhet që edhe për Kosovën, ai të jetë një lider që do të veprojë me përgjegjësi dhe do të punojë me miqtë e Kosovës. Nuk janë vetëm Shtetet e Bashkuara. Edhe Gjermania ka kritikuar atë që po bën Kosova. Ambasadori ka thënë se ky vendim për dinarin tani duhet të bëhet me faza. Kryeministri Kurti tani është në mbrojtje për këtë dhe duhet të japë shpjegime. Dhe presidenti Vuçiq e merr këtë dhuratë. Ai tani duket sikur është një mbrojtës i madh i serbëve të varfër të Kosovës. Pra këto janë gabime shumë të qarta për Kosovën. Këto po dëmtojnë interesin kombëtar të Kosovës në një kohë kur fokusi duhet të jetë tek presidenti Vuçiq si një aleat pro-rus në Ballkan, i cili po destabilizon Kosovën, Malin e Zi dhe Bosnje Hercegovinën”, tha Jospeh

Ai ka komentuar edhe deklaratat e presidentit serb Vuçiq në Këshillin e Sigurimit, që kërkoi kthimin e një pjesë të ushtrisë në Kosovë, si dhe grafitet në mure në veri “Kur ushtria serbe të kthehet në Kosovë”.

Joseph thotë se “në vend që të mbajë përgjegjësi për këtë kritika, Vuçiq sjell në vëmendje çështjen e sigurisë, duke lëshuar kritika ndaj Kosovës dhe pretenduar dhe vepruar sikur presidenti Vuçiq është mbrojtësi më i madh i serbëve ‘të gjorë’ të Kosovës.

“Nuk mund ta them me fjalë se sa gabim i rëndë është ky. Është një autogol në portën e Kosovës. Kjo është të shënosh një autogol në portën tënde kur ke mundësinë të shënosh”, tha ai.

I pyetur nëse ka përfshirje të Rusisë në rritjen e tensioneve mes Serbisë dhe Kosovës, dhe sa real është rreziku që Putin të shtrijë duart dhe në Ballkan për të nxitur një luftë, shqetësim i cili është përsëritur shpesh edhe nga NATO, Joseph tha se sfida kryesore e Kosovës është që të njihet plotësisht, të anëtarësohet në NATO, t’i bashkohet organizatave si INTERPOL.

“Kina dhe Rusia janë bashkuar për të ndihmuar Serbinë. Kjo është krijuar për ta mbajtur Kosovën të izoluar. Është shumë e qartë se çfarë po bëjnë Rusia dhe Kina. Pra, ajo që bëri kryeministri ishte një vendim i pakoordinuar për Evropën, krejtësisht i pakoordinuar. I surprizoi të gjithë, befasoi dhe Gjermaninë. Ai u dha mundësinë Serbisë, Rusisë dhe Kinës të bënin një shfaqje të madhe. Kjo është pikërisht gjëja e fundit që duhej të ndodhte. Prandaj them që kryeministri Kurti, ai dhe bashkëpunëtorët e tij të afërt duhet të reflektojnë, duhet të veprojnë në të mirë të interesit kombëtar të Kosovës, jo në një mënyrë populiste, duke u përpjekur të marrin disa pikë politike brenda me votuesit në Kosovë dhe kundër Vuçiq: ‘Shikoni sa të ashpër jemi’. Ka pasur gabime majin e kaluar që kryeministri Kurti i bëri sërish në mënyrë të pakoordinuar. Ky është një shembull tjetër që kryeministri Kurti duhet të mësojë”, tha Joseph.

Më tej ai tha se “Shtetet e Bashkuara, BE, Gjermania, Mbretëria e Bashkuar, Italia, këta janë miq të mirë të Kosovës”.

“Punoni me miqtë tuaj. Është shumë e thjeshtë. Kjo nuk është e komplikuar. Kjo nuk është e vështirë. Nuk ka asnjë dilemë. Punoni me miqtë tuaj. Po. Vendimi për Euron duhet të zbatohet në një mënyrë. Parandalimi i pastrimit të parave, parandalimi i krimit të organizuar, po duhet të ndodhë. Punoni me Shtetet e Bashkuara me Bashkimin Evropian. Mos bëni hapa të pakoordinuar, provokues që befasojnë të gjithë dhe krijojnë një dhuratë për Aleksandar Vuçiq, për Vladimir Putin dhe për Xi Jinping, të cilët janë të gjithë kundërshtarë dhe armiq të Kosovës”, tha ai.

I pyetur se çfarë mesazhi pritet që të japë Sekretari amerikan i Shtetit, Blinken nga Tirana, për raportet Kosovë-Serbi, por edhe sigurinë në Ballkan, Josph tha se fakti që ai shkon në këtë kohë në Tiranë është shumë i rëndësishëm.

“Ne shohim ndryshimin në Evropë midis mënyrës se si sillen demokracitë dhe se si sillen autokracitë. Ne shohim agresionin e Rusisë kundër Ukrainës. Ne shohim Serbinë duke promovuar narrativa pro ruse për luftën. Shqipëria dhe kryeministri Edi Rama kanë përgjegjësinë e tyre për të çuar përpara demokracinë. Në Shqipëri demokraci do të thotë pjesëmarrje aktive e opozitës. Nuk ka demokraci pa opozitë të fortë, pa konkurrencë reale politike në zgjedhje, edhe në kohën kur nuk ka zgjedhje. Duhet të ketë media të lira dhe kritika të hapura ndaj qeverisë, në mënyrë që qeveria të mbajë përgjegjësi kur gabon. Qeveria duhet të flasë me popullin. Besoj se sekretari Blinken do të sjellë një mesazh se sa e rëndësishme është që Ballkani të jetë i fortë dhe i orientuar drejt NATO-s dhe Bashkimit Evropian. Dhe besoj se Sekretari Blinken do të bëjë një apel për demokracinë dhe se si duhet të zhvillojmë dhe mbajmë demokraci të forta në të gjithë Ballkanin, duke përfshirë edhe Shqipërinë”, tha Joseph.