Kurti: Ambasadori Walker para se të jetë mik i Kosovës, është mik i së vërtetës

Kryeministri i vendit, Albin Kurti, sot në ceremoninë e organizuar nga universiteti “Haxhi Zeka” në Pejë ku ambasadori William Walker u nderua me çmimin “Doctor Honoris Causa”, tha se Walker para se të jetë mik i Kosovës, është mik i së vërtetës.

Kurti para të pranishmëve theksoi se misioni verifikues i OSBE-së ndihmoi në ndryshimin e perceptimit ndërkombëtar për UÇK-në, ndërsa diplomati amerikan me deklaratat e tij ka bërë jehonë për masakrën e Reçakut, duke e vlerësuar si krim kundër njerëzimit.

“Në janar të vitit 1999, Policia e Serbisë e rrethoi fshatin Reçak. Ata vranë e masakruan trupat e 45 banorëve… Asgjë nuk e ka ndryshuar rrjedhën e ngjarjeve se sa jehona e masakrës në Reçak siç ishte raportuar nga ambasadori William Walker. Para se të jetë mik i Kosovës, është mik i së vërtetës”, tha Kurti.

“Në këtë pikë, ambasadori Walker është miku im që nga koha e luftës e deri më sot në Pejë. Më 1998 ai erdhi në Kosovë, ky mision ishte lehtësisht i identifikueshëm me veturat ngjyrë portokolli”, u shpreh ai.

Shpërndaje.
© RAJONIPRESS