Kurteshi: Jemi gati për ta qeverisur Gjilanin me program

Gjilan – Mbrëmë nga Pika e Vetëvendosjes! në fshatin Cernicë, u organizua një tubim me banorët e vendit, ku përpos kandidatit për kryetar të Komunës dhe aktivistëve te tjerë, nga Lëvizja Vetëvendosje mori pjesë edhe lideri i Lëvizjes , Albin Kurti. Të pranishmit përpos që u njohën me programin e qeverisjes komunale të Lëvizjes VV! për Gjilan, u shtruan pyetje edhe për liderin Albin Kurtin. Pyetjet kishin të bënin me privatizimin, decentralizimin, me punësimin etj.

Kandidati për kryetar të komunës së Gjilanit, Ismajl Kurteshi, ka treguar se si Lëvizja VV! është gati për ta qeverisur komunën e Gjilanit, pasi që përveç që ka programin qeverisës lokal për probleme konkrete dhe me zgjidhje konkrete, ka edhe nënprogramet për secilin vendbanim, fshat, e lagje të qytetit. “Këto që i shihni të shkruara në programin tonë qeverisës lokal janë shkruar bashkë me ju. Ju kemi dëgjuar hallet e juaja dhe kemi paraparë ato që të zgjidhen përmes këtij programi. Ne kemi po ashtu edhe nënprogramet për fshatrat dhe lagjet e qytetit, duke dhënë shembull të njohjes së problemeve në komunë dhe duke dhënë zgjidhjet e duhura dhe të realizueshme për ju” – ka thënë Kurteshi.

Një tubim i tillë i shpalimit të vizionit dhe programit qeverisës lokal nga Lëvizja VV!, me përbërje të tillë u mbajt edhe në fshatin Gumnisht. Edhe këtu nga qytetarët e këtij fshati pati interesim për mënyrën e zgjedhjes së shumë problemeve jetike për ta, për planet dhe programin e Lëvizjes për këtë fshat etj. Prania e Albin Kurtit në këtë fshat ishte jashtëzakonisht e mirëpritur dhe fjala e tij dhe kandidatit për kryetar të komunës, zoti Ismajl Kurteshi ishin inkurajuese e në veçanti qasja në zgjidhjen e problemeve të fshatit Gumnisht./rajonipress/