Kur shënon Eminhaziri Gjilani fiton

Gjilan – Në javën e 24-të, futbollistët e Gjilanit në ballafaqim me Lirin e Prizrenit kanë shënuar fitore me rezultat 2-0 me golat e Isa Eminhazirit duke u përforcuar edhe më tepër në tabelën e Vala Superligës së Kosovës në futboll.

Në praninë e 300 shikuesve “bardh e kuqët” e Gjilanit gjatë 90 minutave ishin më superior se kundërshtari i tyre Liria e Prizrenit.

Në minutën e 5-të, Betim Haxhimusa bukur e shërben nga e majta Eminhazirin, i cili me mjeshtri mposht portierin mysafir Armend Ruxhin duke sjellë skuadrën në epërsi në 1-0.

Gjilanasit patën mundësi të shënojnë edhe golin e dytë në minutën e 17-të, por gjuajtjen e Egzon Shabanit e ndal horizontalja e portierit Ruxh.

Në pjesën e dytë futbollistët e Gjilanit dominuan plotësisht në fushë dhe në minutën e 52-të, mbrojtësi Blakqori nga thellësia gjen Eminhazirin i cili nga 13 metra shënon gol të bukur duke i siguruar skuadrës së tij tri pikë të vlefshme nga ky ballafaqim.

Futbollisti më i mirë i sotëm Eminhaziri në minutën e 70 u detyrua ta braktis fushën për shkak të një lëndimi të lehtë.

Skuadra mysafire përgjatë 90 minutave asnjëherë nuk rrezikoi portën e portierit të Gjilanit Donat Kaciut.

Pas ndeshjes golashënuesi i dyfishtë i ndeshjes Isa Eminhaziri deklaroi.
“Shënuam një fitore jo edhe aq të lehtë, një fitore për mesin e tabelës shpresojmë të vazhdojmë me këtë tempo ndërsa jam i lumtur që kam kontribuar me golat e mijë që skuadra të fiton”.

Trajneri i Gjilanasve Arbnor Morina si gjithmonë modest theksoi.
“Ngarkesë e madhe është kjo për futbollist brenda javës po i zhvillojmë tri ndeshje, djelmoshat e mijë përgjatë tërë javës mirë janë përgatitur për këtë ndeshje dhe kjo dha fryt, ndërsa neve edhe më tutje po na përcjell i njëjti problem raste po krijojmë dhe ato nuk po i konkretizojmë por më rëndësi është se luajtëm mirë”.

Ndeshjen me autoritet e ka gjykuar Artan Tahiri nga Prishtina
Ndërsa në javën e ardhshme Gjilani është mysafirë i Besës nga Peja./sylejman ismajli/rajonipress/