Kur është koha më e mirë për të ngrënë hurma për energji dhe tretje më të mirë?
Hurmat nuk janë vetëm një frut i ëmbël, por edhe një burim i mirë energjie dhe fibrash.
Koha e konsumimit mund të përshtatet sipas nevojave të organizmit, veçanërisht kur kërkoni më shumë energji gjatë ditës ose dëshironi të mbështesni tretjen.
Kur duhet t’i hani për më shumë energji?
Hurmave mund t’u drejtoheni në orët e pasdites, veçanërisht rreth orës 15:00, kur shumë njerëz ndihen më të lodhur dhe kanë vështirësi në përqendrim.
Ato janë gjithashtu një zgjedhje e mirë para aktivitetit fizik, pasi karbohidratet që përmbajnë i japin energji muskujve. Kaliumi ndihmon gjithashtu në funksionimin normal të tyre.
Edhe pas stërvitjes, hurmat mund të jenë të dobishme. Kur kombinohen me proteina, ndihmojnë në rikuperimin e organizmit dhe rimbushjen e rezervave të energjisë në muskuj.
Kur t’i konsumoni për tretje më të mirë?
Hurmat përmbajnë fibra që ndihmojnë në funksionimin e rregullt të sistemit tretës. Tre hurma Medjool pa bërthamë ofrojnë rreth 4.8 gramë fibra.
Një studim i vitit 2025 sugjeroi se fibrat e hurmave mund të nxisin rritjen e baktereve të dobishme në zorrë. Megjithatë, nuk është përcaktuar një orar i veçantë për konsumimin e tyre me qëllim përmirësimin e tretjes.
Nutricionistët theksojnë se mund të hahen në çdo kohë të ditës. E rëndësishme është të shoqërohen me ujë të mjaftueshëm, pasi lëngjet ndihmojnë fibrat të kryejnë funksionin e tyre.
Kujdes me sasinë
Edhe pse janë të pasura me fibra, vitamina dhe minerale, hurmat përmbajnë edhe sasi të konsiderueshme sheqernash natyralë dhe kalori.
Për një kombinim më të balancuar, mund t’i shoqëroni me kos grek, gjizë ose gjalpë kikiriku e bajamesh. Proteinat dhe yndyrnat mund të ngadalësojnë përthithjen e sheqerit. /Telegrafi/