Kupa u mbush, oligarkët meritojnë ndëshkim

Qeverisja e vendit nga dy partitë kryesore politike, PDK dhe LDK, me pushtetin lokal nga viti 2001 dhe atë qendror prej vitit 2002, pa ndonjë plan dhe program të prekshëm zhvillimor që të sjellin ndryshime në ngritjen e mirëqenies sociale dhe zhvillimin ekonomikosocial, një vendnumërim total në të gjitha fushat e përditshmërisë qytetare, i ka shndërruar partitë politike në pushtet vetëm në piramida të forcuara të oligarkëve.

Kjo strukturë klienteliste e zgjeruar mandat pas mandati, e instaluar në pushtet, sipas gjykimit të analistëve politikë, jo vetëm që nuk ka pasur në të kaluarën, por nuk ka as sot plane dhe qëllime të mira për zhvillimin e vendit në interes të qytetarëve dhe të vendit, por vetëm për zhvatjen dhe përvetësimin e parave dhe aseteve të shtetit, për interesat e tyre dhe mbështetësve të tyre të tejkriminalizuar. “Këto subjekte politike, që nga vitet e pasluftës dalëngadalë janë zhvilluar në aspektin e përfitimeve, në vendin e dalë nga lufta dhe dhuna, e shfrytëzuan situatën fuqishëm që në vend të rindërtimit të vendit dhe vendosjen e pushtetit në interes të qytetarëve të përvuajtur në shekuj, këto subjekte politike, gati pa dallim arritën të vendosin sistemin anarkik, partiak e familjar klientelist, duke përfituar në mënyrë marramendëse”, shprehet analisti Blerim Burjani.

Ai ka pohuar se nga rritja e trendit të pakënaqësisë dhe mosbesimit qytetar në pushtetin lokal e qendror, prej vitit 2003-2004 e tutje erdhi në rritje trendi i zbrazjes së shtetit nga qytetarët që kulmin e arriti në vitin 2014./kosova sot/