Kule: Problem, njohja e diplomave në Luginën e Preshevës

Tiranë – Studiuesit shqiptar ende nuk i kanë mundësitë për të bashkëpunuar me kolegët e tyre në trojet etnike shqiptare, por edhe më gjerë. Studiuesit kanë kërkuar që te këto projekte konkrete jo vetëm në letër, por edhe në vepër, që ato të financohen dhe më pas të botohen.

Kështu u tha gjatë një konference në Tiranë me temë: “Sfidat e harmonizimit të arsimit të lartë dhe të kërkimit shkencor në trojet etnike shqiptare”, njofton Presheva Jonë” nga Tirana.

“Kam verifikuar një nevojë për harmonizim nga pikëpamja e formatit legjislativ midis vendeve tona. Nga pikëpamja e harmonizimit që të mos kemi pengesa në komunikimin, në transferimet, në mobilitetet, në kërkimet shkencore midis institucioneve të arsimit të lartë në trojet shqipfolëse” tha Dhori Kule, rektor i Universitetit të Tiranës.

Rritja e cilësisë së studentëve dhe pedagogëve është një nga sfidat më të mëdha, me të cilat po përballet arsimi i lartë në të gjitha trojet shqipfolëse. Me këtë qëllim studiues të të gjitha disiplinave nga diaspora e mbarë trojet shqiptare në Ballkan janë mbledhur në konferencën shkencore në Tiranë.

Në takimin e 8 ndërkombëtar me temë “Sfidat e harmonizimit të arsimit të lartë dhe të kërkimit shkencor në trojet shqipfolëse” do të referojnë 465 studiues deri më 31 gusht.