Kufijtë (jo) relaksues

Gjilan – Banorët e Stublinës (Kosovë) dhe të Dobrosinit (Serbi) janë indinjuar tej mase me Policinë kufitare e cila i ka konfiskuar 110 dele një banori të Dobrosinit. Po na ndalin frymëmarrjen dhe hapësirën tonë shqiptare andej e këndej kufirit dhe jemi bërë sikurse kufiri i dy Koreve shprehet krijuesi Arsim Halili.

Policia kufitare ka bërë një gjest jo të mirë i cili ka revoltuar banorët shqiptarë andej dhe këndej kufirit në Stublinë e Dobrosin.

Zymer Osmani banor ngas Stublina thotë se policia kufitare gaboj rëndë në rastin e konfiskimit të deleve. “Unë e njoha pronarin e deleve dhe i thash policisë se ato nuk janë të kontrabanduara. Ne njihemi me njëri tjetrin mirë dhe jetojmë nga këto kafshë. Unë asnjëherë s`kam pasur problem në pjesën e territorit të Serbisë sepse tokat i kemi afër dhe jemi shqiptarë. Tek e fundit kjo sjellje e policisë kufitare e trimëron policinë serbe që të na ndalojë edhe neve punimin e tokave tona në pjesën serbe”shprehet Osmani.

Edhe krijuesi nga Dobrosini Arsim Halili thotë për rajonipress se është shqetësuese sjellja e policëve kufitar. “Kjo nuk është në rregull, sepse realisht po na ndalin frymëmarrjen dhe hapësirë tonë. Banorët e Dobrosinit e në veçanti blegtorët kanë mungesë të livadheve dhe kanë drojë nga xhandarmëria serbe dhe kjo ndikon që ata t`i shfrytëzojnë kullosat e Stublinës. Ne jemi bërë sikur të ishim në kufirin e dy Koreve në vend se të kemi një kufi relaksues”shprehet Halili./rajonipress/