Kuçi për fjalimin e Kurtit: Ishte kërcënim edhe për mediat dhe opozitën që s’po nënshtrohen

Zëdhënësja e Partisë Socialdemokrate (PSD), Natyra Kuçi, ka thënë se kryeministri i Kosovës “po kërcënon opozitën dhe mediat, duke kërkuar nga anëtarët e VV-së që suksesi dhe dështimi të jenë i përbashkët”.

Përmes një postimi në Facebook Kuçi i është referuar një fjalimi që Albin Kurti e ka mbajtur të dielën në Lëvizjen Vetëvendosje.

“Kurti, në fjalimin e tij të mbajtur sot para Këshillit të Partisë, deklaroi qysh mbështetja e aktivistit duhet të jetë e tëra në sukses e dështim. Nëse kjo s’flet për nënshtrim atëherë asnjë deklaratë diskursive nuk mund ta shpërfaqë”, ka shkruar Kuçi.

Ajo po ashtu tha se “Kurti dëshiron t’i bëjë hisedarë imagjinarë të gjithë në pushtetin e tij, në fitore e humbje, arritje e dështim, ashtu që t’i nënshtrojë në hegjemoninë e tij. Kurtit i nevojitet teren homogjen ku kritika mbytet gati si natyrshëm, pa ndërhyrje të drejtpërdrejt të dhunshme sepse ai zgjati dorën kinse e do të bëjë bashkëpronarë në arritjet e dështimet e tij”.

“Mos të harrojmë; ky nuk është mesazh vetëm për militantin e aktivistin e rëndomtë; ky mesazh, nën rreshta, është kërcënimi ndaj opozitës e mediave që po refuzojnë nënshtrimin”, mbaron postimi i Kuçit në Facebook. /Express/

Shpërndaje.
© RAJONIPRESS