Kuçi: Moto e punës sime, besimi në drejtësi

Ministri i Drejtësisë, Hajredin Kuçi, i ka bërë një vlerësim punës brenda institucionit që ai udhëheq. Ai ka thënë se nxjerrja e ligjeve të mira dhe moderne, krijimi i kushteve të veçanta për respektimin e lirive dhe të drejtave të njeriut, janë dëshmi për këtë.

“Kemi nxjerrë shumë ligje që kanë garantuar dhe themeluar institucione të reja që e kanë ndihmuar drejtësinë dhe shërbimin për qytetarë, e kemi ndërtuar noterinë, e kemi ndërtuar ndërmjetësimin, arbitrazhin, përmbaruesit privat, administratorët falimentues dhe një varg institucione tjera si institucione të hulumtimit, të krimeve të luftës, e kemi realizuar agjencinë për sekuestrimin e pasurisë së fituar në mënyrë të paligjshme dhe kemi bërë po ashtu edhe agjencinë e shtetit dhe shumë institucione që funksionojnë në vendin tonë”, ka theksuar Hajredin Kuçi, Ministër i Drejtësisë.

Në ceremoninë e ndarjes së çmimit për drejtësi “Sali Çekaj”, Kuçi tha se në mandatin e tretë si ministër i drejtësisë do të krijojë kushte më të mira për qytetarët në drejtësi.

“Moto e punës sime për 4 vitet e ardhshme do të jetë besimi në drejtësi. Unë e di si fitohet besimi i qytetarëve në drejtësi, bashkë me ju, e di që qytetarët e Republikës sonë kanë dëshirë të shohin gjyqtarë dhe prokuror me dinjitet, profesional, të pavarur, të paanshëm dhe një gjyqësor efikas dhe këtë do ta bëjmë që ta ndihmojmë në tërësi”, ka shtuar Kuçi.

Çmimi vjetor për drejtësi “Sali Çekaj”, sivjet iu ka ndarë post mortum Bajram Kelmendit dhe Adem Bajrit, çmimi për kontribut të jashtëzakonshëm në drejtësi i është ndarë Ismet Kabashit, Esat Stavilecit.

Po ashtu janë ndarë edhe disa çmime për kontribuuesit të ndryshëm në fushën e drejtësisë.

Sali Çekaj” është çmim tradicional dhe jepet në shenjë respekti për ata që japin kontribut në drejtësi. /RTK/