Kryeprokurori Maloku: Operacioni do të vazhdojë edhe më tutje

Gjilan – Nga ky aksion, me urdhër të prokurorisë, deri më tani janë arrestuar 35 persona të dyshuar, prej tyre 12 zyrtarë policorë, kontrabandistë, pronarë të kazinove etj. Ndaj tyre prokuroria brenda afatit ligjor do të kërkojë masat për sigurimin e të pandehurve në procedurë penale ka thënë kryeprokurori Jetish Maloku në konferencën për shtyp.

Prezantim i Kryeprokurorit të Prokurorisë Themelore në Gjilan, Jetish Maloku, në konferencën e mbajtur sot, lidhur me aksionin e realizuar në fshatin Karaçevë dhe rajone tjera të Kosovës.

Ju njoftojmë se Prokuroria Themelore në Gjilan, pas një hetimi të gjatë gati njëvjeçar, gjatë mbrëmjes së djeshme, në bashkëpunim me Policinë e Kosovës, Inspektoratin Policor të Kosovës dhe agjencitë e tjera të zbatimit të ligjit, ka realizuar aksion në fshatin Karaçevë, komuna e Kamenicës, në rajonin e Prishtinës dhe rajonet tjera.

Hetimi ka filluar për shkak të pretendimeve se në atë pjesë janë zhvilluar aktivitete nga grupe të ndryshme kriminale, me elemente korruptive.

Nga ky aksion, me urdhër të prokurorisë, deri më tani janë arrestuar 35 persona të dyshuar, prej tyre 12 zyrtarë policorë, kontrabandistë, pronarë të kazinove etj. Ndaj tyre prokuroria brenda afatit ligjor do të kërkojë masat për sigurimin e të pandehurve në procedurë penale.

Gjatë aksionit janë rrënuar të gjitha kazinotë të cilat kanë funksionuar në atë zonë dhe janë sekuestruar gjësende të ndryshme, si prova materiale, që dyshohet të jenë përdorur në aktivitete kriminale.

Operacioni do të vazhdojë edhe më tutje, ku për të gjitha zhvillimet e mëtutjeshme do të jeni të informuar me kohë ka thënë Maloku./rajonipress/