Kryeprokurori Kabashi: Do t`i hetojmë “Votimet e të vdekurve”

Pos trajtimit të ankesave të parashtruara nga subjektet pjesëmarrëse në votimet e djeshme, Prokuroria Shteti ka nisur hetim edhe për rastet eventuale të votimit në emër të të vdekurve.

“Tani do të përcjellim çështjen e numërimit të votave dhe eventualisht të falsifikimit gjatë numërimit të votave dhe më pastaj do të bëjmë verifikimin se a është votuar në ndonjë vendvotim në emër të personave të vdekur”, ka thënë Kryeprokurori i shtetit, Ismet Kabashi.

Ai këto deklarime I ka bërë në një konferencë për media në Prishtinë, qëllimi i mbajtjes të së cilës ishte njoftimi i qytetarëve, përmes mjeteve të informimit publik, për veprimet që kanë ndërmarrë prokurorët e shtetit në të gjithë territorin e Republikës së Kosovës, me qëllim të mbrojtjes së votës së qytetarëve, gjatë ditës së djeshme dhe të sotme.

Mos-pastrimi i listave të votuesve është një shqetësim që e kanë ngritur po thuajse të gjithë aktorët që merren me zgjedhjet në Kosovë.

Sipas Regjistrimit të fundit të qytetarëve të Kosovës, numri i banorëve në Kosovë është afro 1.8 milionë, derisa numri i votuesve në listën e Komisionit Qendror Zgjedhor del të jetë mbi 1.7 milionë.