Kryeministri Hoti thotë se ata që nuk i respektojnë masat do të përballen me ligjin

Kryeministri Avdullah Hoti ka thënë se policia e inspektorati do të zbatojnë ligjin ndaj atyre që nuk i respektojnë masat e qeverisë, raporton Gazeta Express.

Hoti ka deklaruar se sot është takuar me ministrin Zemaj dhe ekspertët shëndetësorë për të vlerësuar situatën me Covid-19.

“Bashkë me Ministrin Zemaj, drejtorin e SHSKUK-së, Drejtorin e IKSHP-së dhe me ekspertë shëndetësorë, sot kemi vlerësuar situatën me covid-19 dhe përgatitjet që duhet të ndërmarrim në javët në vijim. Është vlerësim i përgjithshëm se momentalisht (në mungesë të vaksinës) i vetmi shpëtim është zbatimi rigoroz i masave: maska, distanca, higjiena dhe evitimi i grumbullimit në masë të qytetarëve. Institucionet shëndetësore janë në maksimumin e kapaciteteve të tyre. Në javët në vijim duhet të krijojmë kapacitete shtesë me shtretër dhe staf shëndetësorë”, ka shkruar Hoti.

Kryeministri është shprehur se pas konsultimeve lidhur me situatën të gjithë ata që nuk i respektojnë masat do të përballen me ligjin.

“Pas këtij diskutimi, me Ministrin Veliu, Drejtorin e Policisë, Kryeshefin e AVUK-ut dhe Drejtorin Ekzekutiv të Asociacioni të Komunave të Kosovës, kemi bërë konsultimet e nevojshme për punën e përbashkët në terren të policisë dhe inspektoratit në mbikëqyrje të masave. Kosova asnjëherë nuk do të shndërrohet në shtet policor, por jemi të obliguar që të ruajmë jetën e qytetarëve. Prandaj, policia dhe inspektorati do të zbatojnë ligjin ndaj atyre që nuk po i respektojnë masat”, ka shkruar Hoti në Facebook./Express/