Kryeministri Hoti paralajmëron pako të re prej 182 milionë eurove për rimëkëmbje ekonomike

Kryeministri i Republikës së Kosovës, z. Avdullah Hoti, ka zhvilluar një takim virtual me anëtarët e Këshillit Kombëtar për Ekonomi dhe Investime në Kosovë, i cili ndërlidh aktivitetet e Qeverisë dhe adreson sfidat e sektorit privat.

Ai ka theksuar se me gjithë situatën sfiduese në kohën që po përballemi me pandeminë Covid-19, Qeveria megjithatë ka siguruar funksionimin e shumicës së bizneseve.

Kryeministri Hoti ka rikujtuar se gjatë muajit tetor janë alokuar 87 milionë euro, prej të cilave 60 milionë i janë dhënë komunitetit të biznesit, duke u ndihmuar atij që të qëndrojë në treg.

Në këtë takim, kryeministri Hoti ka kërkuar që anëtarët e këtij këshilli të dakordohen për Paketën e re për rimëkëmbje ekonomike për vitin 2021, në shumë prej 182 milionë eurosh, si edhe për një listë të reformave për një pako të re fiskale, të cilat pritet të finalizohen në fillim të vitit të ardhshëm.