Krimi po e rrënon ekonominë kosovare

Opozita thotë se institucionet kanë dështuar në performancën e tyre kundër krimit ekonomik, korrupsionit, tregtisë së pandershme dhe monopoleve të krijuara në shumë fusha. Sipas analistëve dhe deputetëve, task-forcat e deritashme më tepër kanë qenë forume, ku vetëm flitet, por që nuk kanë dhënë ndonjë rezultat.

Krimi ekonomik po e vështirëson ambientin e të bërit biznes në Kosovë.

Sipas analistëve të ekonomisë dhe opozitës, vetëm gjyqësori i pavarur dhe efikas është një nga parakushtet vendimtare për luftimin e këtyre dukurive negative në shoqërinë kosovare.

Mirëpo, ata thonë se po shihet se nga ana e pushtetarëve ka një mungesë të madhe të vullnetit politik për ta bërë luftën kundër krimit ekonomik.

Aktualisht në Kosovë veprojnë dy mekanizma, Agjencia Kundër Korrupsionit dhe Këshilli Kombëtar Kundër Korrupsionit, që vepron në kuadër të zyrës së presidencës së Kosovës. Opozita thotë se të dyja këto dy institucione, por edhe prokuroria e gjyqësia, kanë dështuar në performancën e tyre kundër krimit ekonomik, korrupsionit, tregtisë së pandershme dhe monopoleve të krijuara në shumë fusha.

Deputeti i Kuvendit të Kosovës, Pal Lekaj (AAK), vlerëson se task-forcat e deritashme më tepër kanë qenë forume ku diskutohen problemet sesa që kanë dhënë ndonjë rezultat./kosova sot/