Krimi me privatizimin të hetohet dhe të ndëshkohet

Abuzimi i madh me pronën shoqërore pas luftës.Njerëzit e lidhur me pushtetin të mos bëhen pengesë

Analisti Shefqet Dibrani, në një prononcim për gazetën “Kosova Sot”, ka thënë se, nëse Prokuroria Speciale dhe gjykatat ndërkomunale nuk do të bëjnë një hetim gjithëpërfshirës, duke mos përjashtuar kësisoj asnjë rast, i gjithë procesi do të shndërrohet në farsë derisa, siç thotë ai, mund të pësojnë ato grupe dhe ata individë që nuk janë të lidhur me shtetin

Procesi i privatizimit konsiderohet nga analistë dhe ekspertë të ndryshëm se ka qenë i shoqëruar me shumë parregullsi dhe favorizime të ndryshme. Shumë skandale kanë dalë nga privatizimi i ish-ndërmarrjeve shoqërore, ndërsa ka dyshime të forta se pas blerësve qëndrojnë njerëz të afërt me pushtetin.

Por, përveç disa rasteve kur drejtësia ka vepruar dhe ka hapur procese hetimore e gjyqësore, pjesa dërrmuese e aferave kanë mbetur të pazbardhura. Në këtë pikë- pamje duket se për t’i tejkaluar këto dyshime dhe që të zbardhet e vërteta rreth këtij procesi, nga njohësit e kësaj fushe propozohet që të bëhet një hetim gjithëpërfshirës i tërë privatizimeve, me theks të posaçëm i rasteve më të dyshimta, që dyshohet se në to kanë qenë të implikuar njerëz nga politika dhe ku janë përfshirë grupet e ndryshme kriminale të lidhura me këtë të fundit.

Por, mbetet mister se a ka vullnet për t’i shkuar deri në fund aksionit të nisur dhe asaj se a do të ketë një pastrim të politikës nga figurat e korruptuara, që dyshohen se janë përfshirë në privatizimet abuzive të pronës shoqërore.

Analisti Shefqet Dibrani, në një prononcim për gazetën “Kosova Sot”, ka thënë se nëse Prokuroria Speciale dhe gjykatat ndërkomunale nuk do të bëjnë një hetim gjithëpërfshirës, duke mos përjashtuar kësisoj asnjë rast, i gjithë procesi do të shndërrohet në farsë derisa, siç thotë ai, mund të pësojnë ato grupe dhe ata individë që nuk janë të lidhur me shtetin. “Prandaj, çdo hetim selektiv do të jetë me pasoja për t’u ndriçuar gjithë ky kriminalitet ekonomik që ka ndodhur në Kosovë”, ka theksuar ai./kosova sot/