Krimi i organizuar e korrupsioni ka larguar investitorët e huaj

Ish ministri i Ekonomisë dhe Financave, Haki Shatri, ka theksuar se autoritetet e Kosovës nuk kanë bërë asnjë veprim për të eliminuar problemet që kanë shkaktuar mosardhjen e investitorëve në Kosovë.

Krimi i organizuar, ekonomia jo formale dhe korrupsioni në Kosovë, sipas Shatrit janë ato dukuri të cilat kanë larguar investitorët potencial nga vendi.

“Mendoj se e gjithë barra e fajësisë për mosardhjen e investitorëve të huaj në Kosovë bie në institucionet shtetërore dhe politikat e tyre të gabuara ekonomike. Institucionet janë ato të cilat e kanë forcën dhe autoritetin për të krijuar një besim tek investitorët, duke eliminuar të gjitha këto dukuri negative të cilat po e dëmtojnë vendin”, shton Shatri per REL.

Që nga viti 2008, sipas të dhënave zyrtare të Bankës Qendrore të Kosovës, investimet e ndërkombëtare në Kosovë kanë shënuar rënie të vazhdueshme.

Derisa në vitin 2007, Kosova ka pasur brenda vitit rreth 500 milionë euro investime direkte ndërkombëtare, në vitet e fundit ato kanë rënë në rreth 250 milionë euro në vit.