Kreu i Gjykatës Themelore në Gjilan takon gjyqtarin amerikan, Jim Haines

Gjilan – Kryetari i Gjykatës Themelore të Gjilanit, Zyhdi Haziri ka pritur në një takim gjyqtarin nga Shtetet e Bashkuara të Amerikës, Jim Haines, të cilin e ka informuar për punën efikase të këtij institucioni.

“Është një kënaqësi e veçantë për mua me njoftuar gjyqtarin Haines për punën e kësaj gjykate. Inventarizimin e këtij institucioni e ka bërë USAID-i dhe Programi për Sundimin Efektiv të Ligjit (EROL), me këtë rast mysafiri mbeti i kënaqur me këtë investim. Dua të besoj se me investimet e bëra në ndërtesë të gjykatës, nuk do të zhgënjejmë partnerët tanë, por do të jemi shumë më efikas”, tha kryetari Haziri.

Nga ana tjetër, gjyqtari Haines mbeti i kënaqur me punën që bëhet në këtë Gjykatë.

“Qëllimi kryesor ka qenë me vizituar njërën prej gjykatave më të organizuara dhe kushtet më të mira që i posedon. Pres që shumë shpejt me përgatitur librin për gjyqtarët e Kosovës, libër që ka të bëjë me praktikat. Është kënaqësi që takohem me Kryetarin, Haziri dhe informatat që më jep për këtë institucion. Është hera e parë që jam në Kosovë dhe kam ardhur me Programin për Sundimin Efektiv të Ligjit (EROL), do të thotë vizita ime ka të bëjë me seminarin në Gjykatën Kushtetuese”, tha Haines. /rajonipress/