Kreu i Artanës në Asamblenë e Shteteve të Evropës Juglindore

Gjilan – Kryetari i Komunës së Artanës Bajrush Ymeri mori pjesë në asamblenë e Përgjithshme të radhës të Rrjetit të Autoriteteve Lokale të Shteteve të Evropës Juglindore-NALAS.

Në kuadër të Asamblesë së VIII-të të Përgjithshme të radhës të Rrjetit të Autoriteteve Lokale të Shteteve të Evropës Juglindore-NALAS, i cili është mbajtur të shtunën dhe të dielën (19-20 prill 2013) në Shkup të Maqedonisë, pjesëmarrës në këtë ngjarje ishin edhe kryetari i Komunës së Novobërdës Bajrush Ymeri, Naim Ismajli, kryetari i Komunës së Shtimes dhe drejtor i AKK-së, Sazan Ibrahimi.

Në këtë Asamble një ndër zëvendëskryetarët është zgjedhur edhe kryetari i Komunës së Shtimes Naim Ismajli. Kryetari Ismajli tha se në këtë sesion është zgjedhur kryetari i këtij asociacioni dhe tre zëvendëskryetarët e saj. Ai theksoi se pas tri vjetëve për shkak të rotacionit të pozitës së kryetarit të këtij Asociacioni, Kosova do ta ketë radhën e pozitës së kryetarit.

NALAS-i është një rrjet i Asociacioneve të Autoriteteve Lokale të Evropës Juglindore. Rrjeti i bashkon 15 Asociacione të cilat përfaqësojnë rreth 4000 autoritete lokale, të zgjedhur drejtpërdrejt nga më shumë se 80 milionë qytetarë të këtij rajoni.

Sekretariati NALAS-it, me qendër në Shkup, është përgjegjëse për koordinimin e përgjithshëm dhe zbatimin e aktiviteteve. NALAS-i është krijuar në vitin 2001 pas Forumit të parë të Qyteteve dhe Rajoneve të Evropës Jug-Lindore (Shkup, nëntor 2000), organizuar nga Kongresi i Autoriteteve Lokale dhe Rajonale të Këshillit të Evropës. Rrjeti është themeluar nën kujdesin e Paktit të Stabilitetit për Evropën Juglindore dhe Këshillit të Evropës.

Gjatë viteve të para, NALAS-i ka funksionuar si një organizatë jozyrtare me takime të rregullta, seminare dhe programe të trajnimit. Në korrik të vitit 2005 NALAS-i u bë një asociacion i regjistruar zyrtarisht me seli në Strasburg. Sekretariati i NALAS-it u themelua në mars të vitit 2007./rajonipress/