Krasniqi: VV ngritet duke u distancuar nga UÇK-ja, Dimal Basha është fytyra e tyre e vërtetë

Kryetari i PDK-së, Memli Krasniqi ka komentuar raportimet e fundit rreth një artikulli të shkruar kohë më parë nga kryetari aktual i Kuvendit, Dimal Basha ku përmendet UÇK-ja.

Krasniqi në një postim në Facebook ka shkruar se nëse është dikush që e ka pasur mënyrë jetese demonizimin e UÇK-së dhe të udhëheqësve të saj, ai është Albin Kurti. Rrjedhimisht, sipas Krasniqit gati secili që i është bashkuar atij, ka pasur ose ka përvetësuar të njëjtin mentalitet.

“Shembulli i propozimeve nga Lëvizja Vetëvendosje për Kryetar të Kuvendit e tregon më së miri: Albulena Haxhiu, Donika Schwartz, Hekuran Murati – të tre me qëndrime dhe veprime kundër UÇK-së dhe trashëgimisë së saj. Njëra duke ua zvogëluar fondet e mbrojtjes në Gjykatën e Hagës, tjetra duke pranuar se ka dorëzuar dosje kundër krerëve të UÇK-së, e tjetri duke përjashtuar nga paga minimale kategoritë e luftës çlirimtare dhe duke i fyer luftëtarët e lirisë në krahasimet që ua bënte me mercenarë. Edhe Kryekuvendari i ri, me artikullin e tij morbid kundër UÇK-s, i cili doli dje në pah, vetëm sa e konfirmon filozofinë e Vetëvendosjes: sa më shumë të distancohesh nga UÇK-ja, aq më shpejt ngjitesh në parti. Kjo edhe mund të jetë formula e tyre e brendshme”, ka shkruar Krasniqi.

Ai ka sqaruar sërish votën e PDK-së për kryeparlamentarin Dimal Basha.

“Vota jonë nuk ka qenë për individin – por për të mbajtur zotimin e dhënë para qytetarëve, me qëllim të dhënies fund bllokadës institucionale. Por, edhe për ta zhveshur Vetëvendosjen dhe për ta vënë para reflektorit publik të së vërtetës. Sepse, gjatë janë fshehur e amnistuar prapa Glaukave, por në fakt këta janë Dimala. Nëse ndokush ka pasur dyshime, qoftë edhe brenda elektoratit të tyre, sot besoj e kanë të qartë këtë”, ka deklaruar Krasniqi.

“Qëndrimet e tij denigruese dhe fyese ndaj Ushtrisë Çlirimtare”, reagon OVL-UÇK: Basha, njollë mbi dinjitetin e institucioneve
Lexo po ashtu
“Qëndrimet e tij denigruese dhe fyese ndaj Ushtrisë Çlirimtare”, reagon OVL-UÇK: Basha, njollë mbi dinjitetin e institucioneve
Krasniqi ka theksuar se turpi i mbetet Vetëvendosjes dhe Albin Kurtit, të cilët me insistim e kandiduan Dimal Bashën.

“Por, një gjë po vërtetohet edhe tash, siç e kishim thënë në dy herët e kandidimit të tij – ai nuk është i denjë që të jetë Kryetar i Kuvendit. Ndërsa, sa për PDK-në, partinë që e pasoi UÇK-në, pavarësisht gjithçkaje e çdo zhurme, do ta mbrojmë me çdo kusht, si çdo herë tjetër, luftën e UÇK-së dhe shtetin e Kosovës”, tha Krasniqi. /Telegrafi/