Krasniqi: Qeveria në koordinim të ngushtë me SHBA, ta trajtojë me seriozitetin më të lartë gjendjen në veri

Kryetari i Partisë Demokratike të Kosovës, Memli Krasniqi i ka bërë sot thirrje Qeverisë së Kosovës që situatën e krijuar në veri të vendit ta trajtojë me seriozitetin më të madh dhe të fokusohet në gjetjen e zgjidhjes që nuk rrezikon përkeqësimin e situatës.

“Zhvillimet në veri të vendit janë shumë shqetësuese dhe nga ajo që po shohim, kanë një potencial për tu përshkallëzuar tutje. Këto veprime është dashur të mendohen në një sekuencë e cila dërgon në një epilog të qartë dhe fatkeqësisht një gjë e tillë nuk po duket se ka qenë si rast këtë herë”, ka thënë ai.

I pari i PDK-së ka kërkuar koordinim me Amerikën për rivendosjen e rendit publik.

“Ne besojmë se sa nuk ka agravuar situata, është obligim i qeverisë ta trajtojë këtë gjendje. Të koordinohet fuqishëm me partnerët ndërkombëtar dhe në radhë të parë me SHBA për të rivendosur e për të mirëmbajtur rendin publik, ligjshmërinë dhe mbi të gjitha sovranitetin”.

Ai thotë se është e pafalshme të zhbëhet kaq shpejt progresi i arritur në integrimin e serbëve në institucionet e Kosovës.

“Do të ishte e pafalshme që krejt ai progres që është arritur në integrimin e komunitetit serb në institucionet e Republikës së Kosovës, duke përfshirë Policinë, Gjyqësorin, Administratën Publike dhe çdo shërbim tjetër bazik, të humbet e të zhbëhet kaq shpejt”, tha Krasniqi.

Lideri i opozitës i ka bërë thirrje qeverisë që të komunikojë dhe t’i merr për bazë këshillat e SHBA-së dhe partnerëve evropianë për të ofruar zgjidhje në të cilat e ruajnë sovranitetin në pjesën veriore të vendit, mirëmbajnë rendin publik dhe e vënë në funksion përsëri ligjshmërinë e plotë.

Këto deklarata, kreu i PDK-së i ka bërë sot pas vizitës që i bëri Aleancës Kosovare të Bizneseve ku u diskutua për vështirësitë e mëdha me të cilat po përballen bizneset kosovare dhe ekonomia e vendit./Telegrafi/

Shpërndaje.
© RAJONIPRESS