Kryetari i PDK-së, Memli Krasniqi në seancën e sotme të Kuvendit ku po debatohet rreth zhvillimeve në dialogun Kosovë-Serbi, ka paraqitur kërkesën e thirrjes së kësaj seance duke thënë se njohja e ndërsjellë duhet të jetë epilogu i këtij procesi.
“Dialog me epilog, njohje të ndërsjellë mes Kosovës dhe Serbisë. Fjalia bazë që e përmbledh interesin tonë shtetëror dhe konsensusin politik”, ka thënë Krasniqi.
Ai ka shtuar se do të kishte qenë e udhës që Qeveria të ftonte opozitën për një diskutim të tillë të hapur e transparent që të na njoftonte për ecurinë e dialogut.
“Do të ishte e udhës që në rast nevoje të na kërkonte edhe ndihmë me aq sa kemi potencial. Përballë Serbisë e aspiratave të saj nuk ka dallime, përball Serbisë jemi bashkë”, tha i pari i PDK-së.
Krasniqi shtoi se si opozitë sikurse qytetarët janë të painformuar rreth lëvizjeve në dialog.
“Kjo seancë nuk ka karakter të përplasjes e akuzës, por karakter informues. Nuk jemi këtu për të dhënë qëndrimet tona për çështje specifike sepse ne nuk e dimë cila është përmbajtja dhe aranzhmanet që ofrohen në propozimin franko-gjerman”, tha Krasniqi.
Ai kërkoi nga Kurti të tregoi se cili është qëllimi i propozimit evropian dhe se a ofron i njëjti mundësinë e arritjes së nja marrëveshje finale apo vetëm krijimin e një status qou të re.
“A është propozim vazhdimësi e dialogut të deritashëm apo pikënisje e një procesi të ri. Cila është korniza kohore për arritjen ose mosarritjen e marrëveshjes potenciale, a është formati i këtij propozimi një lloj traktati që njeh si etnitete sovrane Kosovën dhe Serbinë. Cila është përmbajtja zyrtare e këtij propozimi, a e parasheh njohjen e ndërsjellë mes Kosovë dhe Serbisë etj”, ka thënë Krasniqi. /Telegrafi/
