Krasniqi pas vendimit të Kushtetueses: Kryesuesi ta thërrasë sa më shpejt seancën e radhë
RajoniPress
16:40, 18 Gusht, 2025
| 11 muaj më parë
Kryetari i PDK-së, Memli Krasniqi, ka reaguar pas vendimit të Gjykatës Kushtetuese, e cila shpalli të pavlefshme seancat e Kuvendit të mbajtura nga 27 qershori deri më 26 korrik 2025, për shkak të veprimeve kundërkushtetuese të Kryesuesit të Seancës Konstituive.
Sipas Krasniqit, vendimi është i detyrueshëm dhe duhet të zbatohet pa vonesa.
“Kryesuesi është i detyruar të vazhdojë procedurat për zgjedhjen e Kryetarit të Kuvendit me votim të hapur. Ky është një vendim i prerë dhe nuk ka më hapësirë për interpretime apo zvarritje”, deklaroi ai.
Kryetari i PDK-së i bëri thirrje Kryesuesit që ta thërrasë sa më shpejt seancën e radhës, duke theksuar se Kosova ka nevojë për institucione funksionale dhe se çdo vonesë është dëm për qytetarët dhe për shtetin.
Ndryshe, Gjykata Kushtetuese e Kosovës ka publikuar aktgjykimin e plotë lidhur me çështjen e konstituimit të Kuvendit.
Më 8 gusht, Kushtetuesja ka urdhëruar Kuvendin që brenda 30-ditësh të zgjedhë kryeparlamentarin e ri përmes votimit të hapur, duke e hedhur në votim të njëjtin kandidat jo më shumë se tri herë.
Me publikimin e aktgjykimit të plotë, nis edhe rrjedhja e afatit 30-ditor, që nënkupton se deputetët nga sot mund të mblidhen për të konstituuar Kuvendin./Telegrafi/
