Krasniqi niset për të fituar përvojë, kthehet me medalje

Prishtinë – Distria Krasniqi ka udhëtuar vetëm për të fituar përvojë në Kampionatin Evropian për xhudistët deri 23-vjet, që këtë fundjavë u mbajt në Pragë të Çekisë.

Por pas paraqitjeve të mira, xhudistja pejane fitoi medaljen e bronztë në kategorinë deri 52 kilogramë. Ky sukses ka befasuar të gjithë, madje edhe vetë xhudisten 16-vjeçare.

Distria Krasniqi bëhet xhudistja e tretë kosovare që fiton medalje në gara të nivelit të lartë, për seniore. Rregullisht medalje Kosovës i sjell Majlinda Kelmendi e gati sa ajo edhe Nora Gjakova.

Kelmendi e Krasniqi të premten në Pragë garuan në kategori të njëjtë, atë deri 52 kg. Kelmendi ishte favorite dhe fitoi pa vështirësi titullin e kampiones së Evropës. Dy partneret e stërvitjeve kanë mundur të takohen në finale të evropianit për seniorët e rinj, por Distria Krasniqi humbi në gjysmëfinale.(koha)