Krasniqi: Është momenti i fundit që të ndërpriten bisedimet me Serbinë

Ish-Kryeparlamentari Jakup Krasniqi, në një postim në Facebook, ka reaguar ndaj deklaratave të zyrtarëve të lartë serbë, të cilët kanë thënë se Beogradi nuk do të heq dorë nga Liqeni i Gazivodës. Zyrtari i lartë i NISMA ka thënë se tani duhet ti bëhet me dije Serbisë se nuk ka prona në Kosovë. Krasniqi thekson se pala kosovare duhet të tërhiqet nga procesi i bisedimeve.

Më poshtë mund të lexoni postimin e plotë të Krasniqit.

Sipas medieve serbe, Vuçiq para syve të Evropës i paska thënë Isa Mustafës: “Mustafa, nuk ka asnjë shans të pranoj kërkesat tuaja. Nuk e japim Gazivodën”.

Konsensus nacional për vazhdimin e bisedimeve me Vuciqin (Serbinë)

Nga Jakup Krasniqi

Kështu paska fol Vuciqi në Bruksel, por ne ende nuk po e dimë se cila ka qenë përgjigja e Kryeministrit te Kosovës. Nëse e shikojmë faktin se zoti Mustafa ju iku gazetarëve në Bruksel, tregon se ai nuk ka qenë në gjendje që Vuciqit t’ia jep një përgjigje adekuate.

Është momenti i duhur që në sytë e në zemrën e Evropës, në Bruksel, Kryeministri i Kosovës dhe secili zyrtar i ngarkuar për bisedime, në secilin nivel te tyre, Serbisë se Vuciqit dhe kujtdo tjetër nga qeveria e Serbisë, që t’ju tregohet me argumente se: Serbia jo vetëm që nuk ka prona në Kosovë, por është Kosova ajo që duhet ti kërkon pronat e saja në Serbi. Është Kosova ajo që duhet t’i kërkoj dëmet e luftës dhe te gjitha plaçkitjet tjera të bëra nga Serbia në Kosovë, plaçkitje që Serbia i ka bërë gjatë 87 viteve në Kosovë. Kur këtyre u shtohen humbjet e mëdha njerëzore te atyre viteve me këto te luftës se fundit, Serbia e Vuciqit është deri në fyt e zhytur në borxhe ndaj Kosovës dhe shqiptarëve si komb.

Kjo sjellje e qeveritarëve serbë, kjo pafytyrësi e tyre dhe mos gatishmëri për të ndjerë pendesë për gjenocidin e ushtruar nga qeveria serbe, pjesë e se cilës ishte Vuciqi, është e mjaftueshme që pala e Kosovës, mos të ulej në tavolinën e bisedimeve me kriminelet që tentojnë të kthehen në vendin e krimit, pa ua rreshtuar një serë kërkesash si kushtëzim për vazhdimin e bisedimeve në Bruksel.

Është momenti i fundit që Qeveria e Kosovës ti ndërpres sa më parë bisedimet dhe të arrihet një konsensus nacional në shkallë kombëtare, sesi dhe kur të vazhdoheshin ato bisedime.

Ky inferioritet i qeveritarëve tanë në këto bisedime duhet të ndërpritet urgjentisht!