RCCOLA

Krasniqi: 107 mijë qytetarë e kanë lëshuar vendin për dy vite të Qeverisë Kurti

/ 2 minuta lexim

Kryetari i Partisë Demokratike të Kosovës, Memli Krasniqi, në seancën e Kuvendit të Kosovës ka thënë se është fytyra e vërtetë e Qeverisë Kurti përgjatë dy viteve është shpopullimi i vendit.

Krasniqi theksoi se përgjatë dy viteve të fundit, 107,310 qytetarë e kanë lëshuar vendin, duke mërguar për një jetë më të mirë.

“Përgjatë dy viteve të fundit, mesatarisht 147 persona në ditë e lëshojnë Kosovën, për të kërkuar një jetë më të mirë larg vendit. Mesatarisht, mbi 1000 qytetarë në javë. Pra, gjatë 2 viteve të qeverisjes suaj, 107,310 qytetarë të Kosovës kanë ikur nga Kosova. Jo si turistë, po si mërgimtarë që kanë humbur shpresën e besimin në perspektivën që mund ta ofroj shteti jonë. Të reja e të rinj, vet e me familje. Nga fshati e nga qyteti, nga çdo cep i Kosovës. Të papunë e të punësuar. Mjekë e mësimdhënës. Infermierë e arkitektë. Inxhinierë e bankerë. Nga çdo kategori sociale”, tha kreu i PDK-së.

Mobi Casa

Krasniqi e ftoi kryeministrin Kurti t’iu shpjegojë rreth 100 mijë familjeve, të cilave ju kanë ikur fëmijët gjatë qeverisjes së tij, se çfarë suksesesh ka arritur për këto dy vite.

“Kosova po zbrazet. Vendi ynë po shpopullohet. Familjet tona po zvogëlohen. Kjo është fytyra e vërtetë e qeverisjes tënde, kryeministër. Ky migrim i paprecedent flet më së miri se sa janë të kënaqur njerëzit dhe familjet me punën tënde. Çkado që flet sot Kryeministër, nuk e ka asnjë vlerë. Mos u merr me neve këtu në Kuvend. Tregoju atyre rreth 100 mijë familjeve që ju kanë ikur fëmijët gjatë qeverisjes tënde se çfarë suksese ke arritur me qeverisjen e sa mirë ua ke përmirësuar jetën”, tha Krasniqi. /Telegrafi/