KQZ-ja ka nënshkruar kontrata në vlerë 700 mijë euro pa tender publik

Shkelje dhe mangësi të shumta në procedurat e prokurimit janë gjetur në Komisionin Qendror Zgjedhor nga Zyra e Auditorit të Përgjithshëm.

Nënshkrimi i tenderëve pa i plotësuar kriteret në dosje të tenderit, përdorimi i procedurave të negociuara pa publikim të njoftimit për kontratë, mbushjet e telefonave pa kontratë, pjesëmarrja e drejtorit të prokurimit në komisionet e vlerësimit të tenderëve – janë shkeljet e evidencuara në raportin e ZAP-it për KQZ-në për pasqyrat financiare në vitin 2013, shkruan Koha Ditore.

KQZ-ja vitin e kaluar kishte nënshkruar tetë kontrata në vlerë prej 699 mijë e 964 eurosh, duke aplikuar procedurën e negociuar pa publikim të njoftimit për kontratë.