Kqiku: Tatimi në pronë shënon ngritje

Gjilan – Salih Kqiku drejtor për financa tha për rajonipress se inkasimi nga tatimi në pronë ka shënuar ngritje. Kqiku tha se vetëm muaji qershor kur ishin zgjedhjet ka pasur rënie, por tani muaji korrik ka shënuar trende pozitive.

Zyrtarët e komunës së Gjilanit janë të kënaqur me inkasimin e tatimit në pronë pavarësisht akuzave dhe kritikave që dha opozita më herët se gjendja në këtë sektor është para kolapsit.

Salih Kqiku drejtor për financa tha për rajonipress se plani është realizuar madje edhe është tejkaluar tek sektori i tatimit në pronë. “Kemi një rritje të tatimit në pronë tani në muajin korrik dhe kemi një trend pozitiv të pagesave në këtë sektor. Realisht vetëm në muajin qershor kur ishin zgjedhjet kemi pasur një rënie, por ajo tani është tejkaluar dhe kemi trend shumë pozitiv” tha Kqiku për rajonipress.

Kqiku tha se është shtyrë edhe vendimi për ndëshkimin e atyre që nuk i kryejnë obligimet i paraparë deri më 31 qershor. “Ky vendim është shtyrë deri më 31 korrik shkaku i mërgimtarëve. Deri në këtë datë nuk do të ketë as ndëshkim e as kamata” tha Kqiku.

Kqiku tha se tani në muajt e verës presin nga diaspora që të mbushet arka e komunës edhe më shumë dhe kështu të rriten të hyrat nga të cilat edhe varet zhvillimi ekonomik dhe realizimi i shumë projekteve që janë nisur në Gjilan./rajonipress/