KPMSHCK vendos në favor të Bashkim Isufit, heq masën disiplinore të vendosur nga Komuna e Gjilanit

Gjilan – Këshilli i Pavarur Mbikëqyrës për Shërbimin Civil të Kosovës ka aprovuar si të bazuar ankesën e parashtruar nga Bashkim Isufi dhe ka hequr masën disiplinore të vendosur nga Komuna e Gjilanit.

KPMSHCK i përbërë nga kolegji që kryesohej nga Ardita Haxhnikaj Demi ka aprovuar kërkesën e Bashkim Isufit i cili ishte ankuar kundër Komunës së Gjilanit në çështjen juridike “masë disiplinore”.

Në vendimin e KPMSHCK thuhet se shfuqizohet vendimi i komisionit për zgjidhjen e kontesteve dhe ankesave i komunës së Gjilanit dhe vendimi i datës 13.12.2018 i komisionit Disiplinor të Komunës së Gjilanit.

Në vendim thuhet se gjithashtu anulohet edhe vendimi i kryetarit të komunës së Gjilanit dhe akt emërimi i datës 12.02.2019.

Obligohet kryetari i komunës së Gjilanit, që të bëjë zbatimin e këtij vendimi brenda afatit kohor prej 15 ditësh nga dita e pranimit të tij, duke e kthyer ankuesin në pozitën “zyrtar juridik” në drejtorinë e urbanizimit dhe mbrojtje të mjedisit, me të gjitha të drejtat dhe detyrimet që rrjedhin nga marrëdhënia e tij e punës.

KPMSHCK duhet të njoftohet me shkrim pas ndërmarrjes së veprimeve në pajtim me këtë vendim.

Kolegji ka shqyrtuar pretendimet ankimore të ankuesit i cili pretendonte se drejtori i urbanizmit nuk është personi kompetent për të iniciuar kërkesën për procedurë disiplinore./rajonipress/