KPF në Viti miraton Kornizën Afatmesme Buxhetore 2027-2029 dhe procedon vendime të rëndësishme për Kuvendin Komunal

Viti – Komiteti për Politikë dhe Financa (KPF) i Komunës së Vitisë ka mbajtur mbledhjen e pestë të rregullt, ku në fokus të diskutimeve ishte planifikimi buxhetor afatmesëm dhe çështje të tjera me rëndësi për funksionimin institucional dhe zhvillimin komunal.

Mbledhja u drejtua nga kryesuesi i Kuvendit Komunal, Bekim Azizi, ndërsa i pranishëm ishte edhe zëvendëskryetari i Komunës, Hasan Aliu. Anëtarët e komitetit shqyrtuan disa pika të rendit të ditës, të cilat pas diskutimeve u rekomanduan për procedim në Kuvendin Komunal për vendimmarrje.

Vëmendje e veçantë iu kushtua Kornizës Afatmesme Buxhetore (KAB) 2027-2029, dokumentit strategjik që përcakton orientimet financiare dhe prioritetet zhvillimore të komunës për tri vitet e ardhshme. Propozim-vendimi u prezantua nga drejtoresha për Buxhet dhe Financa, Milihate Ajeti, ndërsa pas shqyrtimit mori mbështetjen e anëtarëve të komitetit.

Po ashtu, KPF miratoi edhe propozim-vendimin për themelimin e grupit punues që do të hartojë planin vjetor të punës së Kuvendit Komunal për vitin 2027, me synimin e forcimit të planifikimit institucional dhe rritjes së efikasitetit në funksionimin e organit më të lartë përfaqësues të komunës.

Në kuadër të mbledhjes u shqyrtua dhe u mbështet edhe propozim-vendimi për ndryshimin dhe plotësimin e vendimit që lidhet me ndarjen e një parcele kadastrale në pronësi komunale, në përputhje me vendimin e mëhershëm të Kuvendit Komunal.

Pas debatit dhe analizës së pikave të paraqitura, Komiteti për Politikë dhe Financa rekomandoi që të gjitha propozimet e miratuara të procedohen për shqyrtim dhe miratim në seancën e ardhshme të Kuvendit Komunal të Vitisë.

Mbledhja u vlerësua si një hap i rëndësishëm në procesin e planifikimit financiar dhe institucional, duke krijuar bazat për realizimin e objektivave zhvillimore dhe menaxhimin e qëndrueshëm të resurseve komunale në vitet e ardhshme./rajonipress/