KPF miraton propozim – buxhetin për vitin 2016

Gjilan – Zijadin Maliqi, drejtor për Financa, ka thënë se buxheti i përgjithshëm i planifikuar për vitin 2016, është 21.354.701 euro. Këto mjete do të sigurohen nga granti qeveritar – 17.354.701 euro dhe nga të hyrat vetanake – 4.000.000 euro.

Komiteti për Politikë dhe Financa (KPF), të enjten, në mbledhjen e radhës për këtë vit, të cilën e ka drejtuar Valentina Bunjaku-Rexhepi, kryesuese e Kuvendit Komunal, ka miratuar propozim-buxhetin për vitin 2016 si dhe pika të tjera të rendit të punës.

KPF rekomandoi për Kuvend Komunal edhe nismën për shpalljen e zonjës Hanife Malaj “Qytetare Nderi”, propozim-vendimin për përbërjen e Komitetit konsultativ të ekspertëve të planifikimit hapësinor, draft-rregulloren për tatimin në pronë, raportet e komisioneve të aksionarëve për ndërmarrjet publike “Ecohigjiena” dhe Stacioni i Autobusëve, propozimin për kompensimin e komisionit për emërtimin e rrugëve, raportin e korrje-shirjeve si dhe u njoftua me raportin e auditimit për pasqyrat financiare në komunën e Gjilanit, për vitin 2014.

Zijadin Maliqi, drejtor për Financa, ka thënë se buxheti i përgjithshëm i planifikuar për vitin 2016, është 21.354.701 euro. Këto mjete do të sigurohen nga granti qeveritar – 17.354.701 euro dhe nga të hyrat vetanake – 4.000.000 euro.

Ky buxhet do të shpenzohet për paga – 14.286.213 euro, për mallra dhe shërbime – 2.519.914, për shpenzime komunale – 562.200, për subvencione – 554.086 dhe për shpenzime kapitale – 3.432.288 euro. Pos ta pagat, te kategoritë tjera ka ulje të shpenzimeve për 12 për qind, me qëllim të mos preken investimet kapitale, ka thënë Maliqi.

Sipas tij, vitin e ardhshëm pritet të ketë donacione bukur të mëdha për komunën e Gjilanit.

Bujar Nevzati (PDK) tha se në tabelat buxhetore nuk figurojnë kërkesat e qytetarëve për investime, të cilat janë dhënë nëpër debatet publike, ndërsa Maliqi sqaroi se për shkak të kohës së shkurtër nuk ka qenë e mundur kjo të bëhet në formë tabelore, por siguroi se kërkesat do të përfshihen në planin e prokurimit.

KPF e ka rekomanduar për Kuvend Komunal edhe propozimin për shpalljen “qytetare nderi” të zonjës Hanife Mala, bashkëshorte e dëshmorit Rexhep Mala, që ka ardhur si nismë e kryetarit të Komunës. Valentina Bunjaku-Rexhepi tha se propozimi është bërë duke u bazuar te meritat e zonjës Mala, si një grua e guximshme dhe e suksesshme, përballë sfidave dhe sakrificave me të cilat është përballur në jetë.

KPF rekomandoi edhe pikat tjera. Sipas rregullores së re për tatimin në pronë, komuna e Gjilanit ndahet në pesë zona tatimore dhe në dy nënzona, ndërsa norma tatimore do të jetë 0,15 dhe 0,17 për qind, varësisht prej kategorisë së pronës.

Siç dihet, Komuna e Gjilanit, nga viti 2015 ka bërë uljen e normës, e cila më herët ishte 0.25 për qind.
Përndryshe, opozita pati disa kërkesa, duke insistuar që ato të futen në rendin e ditës së seancës së Kuvendit Komunal, që mbahet brenda këtij muaji.

Bujar Nevzati (PDK) kërkoi të jetë një informatë për fillimin e vitit shkollor, përfshirë edhe pranimin e kuadrit mësimor, ndërkaq Sahit Abazi (PDK) kërkoi debat në Kuvend për, siç tha ai, disa akuza të kryetarit të Komunës ndaj këtij subjekti, pas dëmtimit të disa veturave zyrtare. Ata u përkrahen edhe nga Nevzad Isufi (VV), i cili përsëriti edhe kërkesën për një informatë për ndërtimet pa leje.

Valentina Bunjaku-Rexhepi tha se informata për fillimin e vitit shkollor do të ofrohet në seancën tjetër të Kuvendit Komunal, meqë në kohën kur është planifikuar të mbahet seanca e shtatorit, drejtori i Arsimit do të jetë jashtë vendit.

Sa i përket kërkesave që kanë të bëjnë me kryetarin e Komunës, Avdyl Aliu (LDK) ka thënë se nuk është e nevojshme të futen në rend dite, si pikë e veçantë, sepse kryetari do të jetë i pranishëm në seancë dhe me siguri se do t`iu përgjigjet pyetjeve të këshilltarëve të opozitës./rajonipress/