Gjilan – Komiteti për Politikë dhe Financa (KPF), në mbledhjen e sotme, të kryesuar nga Shpresa Kurteshi-Emini, ka shqyrtuar dhe rekomanduar për Kuvend Komunal, raporti financiar për periudhën janar-mars 2021, propozim-vendimin për dhënien në shfrytëzim afatgjatë të pronës komunale përmes shprehjes së interesit, propozim-vendimin për formimin e komisionit vlerësues të ofertave, informatën rreth manifestimit tradicional “Flaka e Janarit” 2021, kërkesën për lirim nga pagesa e të gjitha bizneseve të cilat janë duke shfrytëzuar hapësirat publike për qëllime biznesore si dhe kërkesën për kompensimin e komisionit për vlerësimin e ofertave.
Komiteti i dha përkrahje kërkesës së këshilltarit komunal, Burim Berisha (LDK), përkatësisht nismës së këshilltarit Nehat Osmani (VV) për miratimin e një pakoje të ndihmës për bizneset, duke e marrë parasysh gjendjen e rënduar ekonomike në gjithë Kosovën, me theks të veçantë në Gjilan, si shkak i pandemisë Covid-19.
Kërkesa ka të bëjë me lirimin nga pagesa për këtë vit të të gjitha bizneseve që kanë në shfrytëzim hapësira komunale dhe që i përdorin ato për nevoja biznesore, lirimin nga pagesa për pranim teknik të lokalit për bizneset e reja si dhe lirimin nga pagesa e qirasë mujore për vitin 2021 të bizneseve që shfrytëzojnë lokale në pronësi komunale.
Sa i përket propozim-vendimit për dhënien në shfrytëzim afatgjatë të pronës komunale, ku arsyetimin e dha drejtori i Kadastrës, Sali Fazliu, i cili sqaroi se bëhet fjalë për një ngastër prej 3.5 ha në Bresalc, anëtarët e Komitetit kërkuan që njëkohësisht të bëhet një zgjidhje për lokacionin e varrezave të lagjes, të cilat gjenden brenda kësaj hapësire, pavarësisht statusit të tyre./rajonipress/
