KPF e vlerëson të rëndësishme rregulloren për largimin e objekteve të përkohshme

Viti – Komiteti për Politik e Financa ka mbajtur sot mbledhjen e XI-të të rregullt me që rast janë shqyrtuar disa pika me rëndësi.

Fillimisht kryesuesi i Kuvendit komunal të Vitisë Naim Pira, ka njoftuar anëtarët e KPF-së për konfirmimin e vendimeve të Kuvendit në harmoni me ligjet në fuqi, nga ana e Ministrisë së Administrimit të Pushtetit Lokal.

Ndërsa për mbledhjen e sotme të KFP-së , ishte paraparë propozim rregullorja për vendosjen, ndërtimin dhe largimin e objekteve të përkohshme në pronë publike dhe propozim vendimi për shpalljen e diskutimit publik.

Këtë propozim rregullore e prezantoi drejtori i Drejtorisë Urbanizëm, Planifikim dhe Mbrojtje të Mjedisit Ajet Sallahu, i cili përmendi rëndësinë dhe efektin që do ta ketë kjo rregullore.

Ai ka prezantuar edhe draft rregulloren për dhënien e lejeve mjedisore komunale dhe propozim vendimin për shpalljen e diskutimit publik, qëllimi i së cilës është parandalimi dhe zvogëlimi i ndikimit negativ në mjedis të shkaktuar nga subjektet publike e private, në rastet e realizimit të veprimeve dhe projekteve të cilat mund të shkaktojnë çrregullime në mjedis.

Që të dyja këto propozim rregullore të propozuara nga drejtoria e Urbanizimit, Planifikimit dhe Mbrojtje të Mjedisit u aprovuan nga anëtarët e KPF-së, për të proceduar në seancën e ardhshme të kuvendit.

Në këtë mbledhje u shqyrtuan edhe pikat të tjera si: propozim vendimi për shpalljen e zonës ekonomike në kuadër të zyrës në Budrikë e Epërme, propozim vendimi për fillimin e iniciativës dhe veprimeve përgatitore për aplikim në Ministrinë e Tregtisë dhe Industrisë, për themelimin e Zonës ekonomike në Budrikë, Draft strategjia komunale kundër dhunës në familje 2016-2018, si dhe plani lokal i veprimit për Riintegrim të të Riiatdhesuarit. /rajonipress/