Kozniku flet për gjasat e Kroacisë në Kupën e Botës dhe se a ka hequr dorë nga Kosova

Ish-futbollisti i njohur nga Kosova, Ardian Kozniku, ka folur ekskluzivisht për emisionin “Favoriti i Botërorit” në T7 lidhur me Kupën e Botës “Katar 2022”, në veçanti për Kombëtaren e Kroacisë.

Kozniku ka qenë pjesë e Kroacisë në Kupën e Botës të vitit 1998 në Francë, ku kroatët u stolisën me medalje të bronztë – shkruan Gazeta Express.

Ish-futbollisti i Prishtinës dhe Vëllaznimit fillimisht tha se çdo turne i tillë pritet me emocione të mëdha, pasi që luajnë ekipet më të mira.

Pastaj për Kroacinë, që e luan nesër ndeshjen e parë kundër Marokut në Katar, Kozniku u shpreh: “E vërtetë që ka shumë futbollistë në moshë. Por, e kanë bërë një kombinim mes të rinjve dhe vjetërve. Në këtë rast ka mbetur thelbi me lojtarët me përvojë, zemra e ekipit, si Luka Modric që po shkëlqen ende me Real Madridin”.

“Në Kroaci po presin me padurim pasi kanë regjistruar rezultate të mira në Ligën e Kombeve. Pritet një rezultat i favorshëm, edhe pse futbollistët e respektojnë Marokun”, shtoi 55-vjeçari.

Ish-futbollisti gjakovar tutje foli edhe për favoritët e këtij turneu.

“Për momentin në letër favoritë janë Brazili, Argjentina, Spanja, Anglia, Gjermania. Mirëpo, e pamë edhe vetë se ka befasi. Por, është ende vetëm xhirojae parë. Megjithatë, nuk ka ekip për ta nënçmuar. E kemi edhe Zvicrën, mos të harrojmë. E dimë që shumë shqiptarë të shumë shteteve anojnë për të”, tha Kozniku.

Ish-reprezentuesi i Kroacisë, i cili është ndihmës-trajner te skuadra nga Kuvajti, Al-Arabi SC, tha se, nëse do të ketë mundësi, do ta ndjek ndonjë ndeshje të Kupës së Botës në Katar.

“Për momentin jemi në pushim. Kemi 7 ditë pushim. Nëse na jepet mundësia do të shkojmë. Jemi në fazën përgatitore. Nuk e di”.

Ardian Kozniku në fund u pyet edhe nëse ka hequr dorë nga synimi për t’iu bashkuar Kombëtares së Kosovës.

“Unë jam i gatshëm, e kam thënë që 15 vjet. Por, për momentin jam duke punuar. Kosova e ka selektorin. Dëshira e çdo trajnerit është të jetë pjesë e reprezentacionit”, tha ai. /Gazeta Express/